জি টিভিৰ জনপ্ৰিয় ৰিয়েলিটি শ্ব’ ডান্স ইণ্ডিয়া ডান্স, লিটল মাষ্টাৰ্চৰ বাবে গুৱাহাটীত অনুষ্ঠিত হ’ব প্ৰতিযোগিতাখনৰ বাচনি শিবিৰ। গুৱাহাটীৰ খানাপাৰাস্থিত নেৰিম প্ৰতিষ্ঠানত ১৯ জানুৱাৰি, শুকুৰবাৰে ৰাতিপুৱা ৯ বজাৰ পৰা আৰম্ভ হ’ব প্ৰতিযোগিতাখনৰ অডিশ্যন।
২০০৯ চনত আৰম্ভণি হোৱা প্ৰথম সংস্কৰণৰ পৰাই জনপ্ৰিয় ৰিয়েলিটি শ্ব’ ডান্স ইণ্ডিয়া ডান্স আগশাৰীৰ টেলিভিছন জি টিভিত সম্প্ৰচাৰ হৈ আহিছে। প্ৰতিযোগিতাখনৰ প্ৰথন সংস্কৰণত বলিউডৰ দাদা হিচাপে খ্যাত মিথুন চক্ৰৱৰ্তীৰ লগতে বলিউডৰ লগত জড়িত আন তিনিগৰাকীৰ সৈতে বিচাৰকৰ আসনৰ দায়িত্বত আছিল।
উল্লেখযোগ্য যে ভাৰতৰ প্ৰায় সকলো ডাঙৰ চহৰতে ডান্স ইণ্ডিয়া ডান্স প্ৰতিযোগিতাৰ অডিশ্যন হ’ব। এই মুকলি অডিশ্যনত ১৬ বছৰৰ তলৰ সকলো শিশুৱে অংশগ্ৰহণ কৰিব পাৰিব। মুকলি অডিশ্যন সফলতাৰে পাৰ কৰাৰ পিছত লিটল মাস্তাৰ্চ সকলে এটা মেগা অডিশ্যনৰ মাজেৰে নিজৰ নিজৰ প্ৰতিভা দেখুৱাই পৰৱৰ্তী ৰাউণ্ডলৈ প্ৰৱেশ কৰিব পাৰিব। চূড়ান্ত ৰাউণ্ডত মুঠ ১৮ গৰাকী শিশুৱে খিতাপ দখলৰ বাবে প্ৰতিদ্বণ্ডী সকলৰ সৈতে যুঁজ দিব। এই প্ৰতিযোগিতাত দেশৰ বিভিন্ন ৰাজ্যৰ জাতি-জনগোষ্ঠীৰ নৃত্য-কলা আদি দেখিবলৈ সক্ষম হয়।
বিগত কিছু বছৰৰ পৰা জি টিভিয়ে আয়োজন কৰি অহা ডান্স ইণ্ডিয়া ডান্স, লিটল মাষ্টাৰ্চৰ জৰিয়তে দেশৰ সকলো প্ৰান্তৰে শিশু সকলে নিজৰ প্ৰতিভা বিকাশ কৰাৰ সম্পূৰ্ণ সুযোগ পোৱাৰ উপৰি অৰ্থনৈতিকভাবে দুৰ্বল পৰিয়ালৰ সন্তানে এই প্ৰতিযোগিতাত অংশগ্ৰহণ কৰি স্বাবলম্বী হোৱা পৰিলক্ষিত হৈছে। তদুপৰি এই প্ৰতিযোগিতাৰ জৰিয়তে বহু নৃত্য শিল্পী বলিউডত খোপনি পুতিবলৈও সক্ষম হৈছে।
