আজি পুৱাৰ ভাগতে মুখ্য মন্ত্ৰীৰ দুৰ্নীতি বিৰোধী আৰু তদাৰকী কোষৰ এটা দলে ৰাজ্যখনৰ এজন জ্যেষ্ঠ বন বিষয়া আফতাব উদ্দিনৰ ঘৰত দুৰ্নীতি বিৰোধী অভিযান চলায়। এটা সূত্ৰই এন ই নাওক জানিবলৈ দিয়ে যে আফতাব উদ্দিনৰ বিৰুদ্ধে আয়তকৈ অধিক সম্পত্তি আহৰণৰ অভিযোগত এই অভিযান চলোৱা হৈছে।
অভিযানকাৰী দলটোৱে তেওঁৰ গুৱাহাটীৰ সুন্দৰপুৰস্থিত বাসগৃহৰ (ঘৰ নং ৪৫) লগতে ছয়মাইল আৰু স্পেনিছ গাৰ্ডেনত থকা তেওঁৰ এটা কোটিটকীয়া ফ্লেটতো অভিযান চলায়। আনহাতে জাপৰিগোগত থকা তেওঁৰ মালিকানাধীন এটা গাৰ্লছ হোষ্টেলতো অভিযান চলায় অভিযানকাৰী দলটোৱে।
সূত্ৰটোৱে জনোৱা মতে অভিযানৰ সময়ত কেইবাকোটি টকাৰ স্থাৱৰ-অস্থাৱৰ সম্পত্তিৰ নথি-পত্ৰ জব্দ কৰা হৈছে।
তেওঁৰ বিৰুদ্ধে ভুৱা চালানেৰে চৰকাৰী ধন সৰকোৱাৰ অভিযোগো অনা হৈছে।
উল্লেখযোগ্য যে আফতাব উদ্দিন কংগ্ৰেছ চৰকাৰৰ দিনত নগাৱঁৰ বন বিষয়া হৈ আছিল। জানিব পৰা মতে তেওঁ ৰকিবুল হুছেইনৰ ঘনিষ্ঠ আছিল।
