কাৰ্বি আংলঙৰ ডকমকাত হোৱা হত্যাকাণ্ডটোৰ ‘গইনা লৈ’ ‘ৰাজ্যজুৰি হোৱা উত্তেজনাই এক সাম্প্ৰদায়িক তথা জাতিগত বিদ্বেষৰ ৰূপ লোৱা’ৰ প্ৰতি লক্ষ্য ৰাখি ‘সমূহ জনসাধাৰণৰ মাজত সম্প্ৰীতিৰ বাতাৱৰণ অক্ষুণ্ণ ৰখাৰ স্বাৰ্থত’ ৰাজ্যৰ একাংশ শিল্পী, সাহিত্যিক আৰু নাগৰিকে অহা ১৯ জুন মঙলবাৰে আবেলি ৩-৩০ বজাত গুৱাহাটী লক্ষীধৰ বৰা ক্ষেত্ৰত ‘হিংসা, বিদ্বেষ, সাম্প্ৰদায়িক বিভেদৰ বিৰুদ্ধে ঐক্য সম্প্ৰীতিৰ আহ্বান’ শীৰ্ষক এক অনুষ্ঠানৰ আয়োজন কৰিছে৷
অনুষ্ঠানটো ‘এটা ঘটনাৰ মাথো প্ৰতিক্ৰিয়া নহয়, এয়া গতিশীল সময়ৰ লগত জাতিক খাপ খুৱাই তুলিব পৰাকৈ জ্যোতিপ্ৰসাদৰ ভাষাত দুষ্কৃতিৰ বিৰুদ্ধে সাংস্কৃতিক মহাজাগৰণৰ আৰম্ভণি’ বুলি ঘোষণা কৰি আয়োজকসকলে অনুষ্ঠানটোত সকলোৰে উপস্থিতি কামনা কৰিছে।
নীলোৎপল-অভিজিতলৈ শ্ৰদ্ধাঞ্জলি আৰু পৰিয়াললৈ সমবেদনা জনাই আয়োজকসকলে ‘হত্যাকাৰীসকলক শাস্তি প্ৰদান কৰা’ আৰু একে সময়তে গোষ্ঠী বিদ্বেষ ‘প্ৰতিহত কৰা’ৰ বাবে ‘ৰাইজক সতৰ্ক হৈ থাকিবলৈ আহ্বান’ জনাইছে।
আয়োজক সুদক্ষিণা শৰ্মা, সমৰ হাজৰিকা, পুলক বেনাৰ্জী, লোকনাথ গোস্বামী, বাহাৰুল ইছলাম, ৰবিৰাম ব্ৰহ্ম, সঞ্জয় কুমাৰ তাঁতী, চন্দ্ৰকান্ত তেৰাং, নিতুপৰ্ণ ৰাজবংশী, জ্ঞানেন বৰকাকতী, পখিলা লেপথেপী, কিশোৰ কুমাৰ কলিতা, শান্তনু বৰঠাকুৰ, ৰুণু দেৱী, পুলক গগৈ, হিমাংশু প্ৰসাদ দাস, ৰবিজিতা গগৈ, বীৰেন সিংহ, কিৰণ শংকৰ, চম্পক বৰবৰা আৰু বিদ্যাসাগৰে আজি ১৭ জুনত ‘হিংসা, বিদ্বেষ, সাম্প্ৰদায়িক বিভেদৰ বিৰুদ্ধে ঐক্য-সম্প্ৰীতিৰ আহ্বান’ শীৰ্ষক এটি আবেদনো জাৰি কৰিছে।
