নাগৰিকত্ব সংশোধনী বিধেয়কৰ জৰিয়তে বিদেশী হিন্দু লোকসকলক ভাৰতীয় নাগৰিকত্ব প্ৰদানৰ জৰিয়তে ভাৰতত সংস্থাপিত কৰিবলৈ ওলোৱা কাৰ্যৰ বিৰুদ্ধে ৰাজ্যৰ সৰ্বত্ৰে প্ৰতিবাদ সাব্যস্ত হৈ থকাৰ সময়তে উক্ত বিধেয়কখন বাতিলৰ দাবীৰে চামগুৰিত আজি ৩৭ নং ৰাষ্ট্ৰীয় ঘাইপথ অৱৰোধ কাৰ্যসূচী গ্ৰহণ কৰে কৃষক শ্ৰমিক উন্নয়ন পৰিষদে।
সংগঠনটোৰ চামগুৰি সমষ্টি সমিতিৰ শতাধিক সদস্য কৰ্মীয়ে চামগুৰিৰ পহুকটাত উপস্থিত হৈ বিতৰ্কিত বিধেয়কখন বাতিলৰ দাবী উত্থাপন কৰি কিছু সময়ৰ বাবে ৰাষ্ট্ৰীয় ঘাইপথটো আবদ্ধ কৰি ৰাখে।
প্ৰতিবাদৰ সময়ত সংগঠনটোৰ নেতা কৰ্মীয়ে মুখ্য মন্ত্ৰী সৰ্বানন্দ সোণোৱাল আৰু আৰএছএছক তীব্ৰ ভাষাৰে গৰিহণা জনোৱাৰ লগতে কেন্দ্ৰীয় চৰকাৰ তথা ৰাজ্য চৰকাৰক এই জাতিধ্বংসী বিধেয়কখন অনতি পলমে বাতিল কৰাৰ বাবে প্ৰতিবাদস্থলীৰ পৰা আহ্বান জনায়।
উল্লেখ্য যে সংগঠনটোৰ চামগুৰি সমষ্টি সমিতিৰ সভাপতি প্ৰদীপ কলিতাই বিধেয়কখন প্ৰসংগত কয় যে যদিহে এই বিধেয়কখন গৃহীত হয় তেন্তে অসমীয়া সমাজত ই বিৰূপ প্ৰভাৱ পেলাব। তাৰোপৰি বিধেয়কখনৰ সন্দৰ্ভত মন্ত্ৰী হিমন্ত বিশ্ব শৰ্মাক বদন বৰফুকন ৰূপেও আখ্যা দিয়ে সভাপতি প্ৰদীপ কলিতাই।
