চাৰি শতাধিক খেলুৱৈৰ অংশগ্ৰহণেৰে গুৱাহাটী চিটি এফ চিৰ ট্ৰায়েল সম্পন্ন
উত্তৰ-পূবৰ বিভিন্ন ৰাজ্যৰ মুঠ ৪৩৩ গৰাকী খেলুৱৈৰ অংশগ্ৰহণেৰে ৫ মে’ৰ পৰা দুদিনীয়াকৈ কাঁহিকুছিৰ উদ্যানশস্য গৱেষণা প্ৰতিষ্ঠানৰ খেলপথাৰত অনুষ্ঠিত হৈ যায় গুৱাহাটী চিটী এফ চি চমুকৈ জি চি এফ চিৰ অনুৰ্ধ ১৮ দলৰ ট্ৰায়েল।
দেওবাৰে সমাপ্ত হোৱা ট্ৰায়েলত অসমৰ ২২৭ গৰাকী আৰু উত্তৰ-পূবৰ অন্য ৰাজ্যৰ লগতে গুজৰাট, উত্তৰ প্ৰদেশ, মধ্যপ্ৰদেশ আৰু পশ্চিমবংগৰ ২০৬ গৰাকী খেলুৱৈয়ে অংশ লয় বুলি ক্লাবৰ সঞ্চালক কৌস্তৱ চক্ৰৱৰ্তীয়ে এক বিবৃতিযোগে জানিবলৈ দিয়ে।
স্থানীয় প্ৰতিভাক এক মঞ্চ দিয়া আৰু বয়স ভিত্তিক ৰাষ্ট্ৰীয় প্ৰতিযোগিতাসমূহত প্ৰতিনিধিত্ব কৰাৰ লক্ষ্যৰে জি চি এফ চিয়ে বয়সভিত্তিক দল গঠনৰ প্ৰক্ৰিয়া আৰম্ভ কৰিছে আৰু তাৰ অংশ হিচাপেই স্পৰ্টছক্ৰাফট মেনেজমেণ্টৰ সহযোগত অনুৰ্ধ ১৮ দলৰ বাবে ট্ৰায়েল অনুষ্ঠিত কৰা হয় বুলি তেওঁ জানিবলৈ দিয়ে।
এই দলটোৱে স্থানীয়, আঞ্চলিক আৰু ৰাষ্ট্ৰীয় যুৱ প্ৰতিযোগিতাসমূহত ক্লাবক প্ৰতিনিধিত্ব কৰাৰ লগতে অনুৰ্ধ আই লীগতো প্ৰতিদ্বণ্ডিতা কৰাৰ লক্ষ্য স্থিৰ কৰিছে। ইয়াৰ উপৰি জি চি এফ চিয়ে শীঘ্ৰে অনুৰ্ধ ১৩ আৰু অনুৰ্ধ ১৫ দলো গঠন কৰিব বুলি ক্লাবৰ সঞ্চালকগৰাকীয়ে জনায়।
একেদৰে মহানগৰীৰ বিভিন্ন স্থানত ছকাৰ স্কুল, এখন ফুটবল একাডেমি স্থাপনৰ প্ৰক্ৰিয়াও ক্লাবে আৰম্ভ কৰা বুলি সদৰী কৰে।
আনহাতে সৰ্বাভাৰতীয় বেবী লীগৰ আৰ্হিত জি চি এফ চিয়ে ৰাজ্যৰ ৬ৰ পৰা ১৩ বছৰৰ খেলুৱৈৰ বাবে এক পেছাদাৰী লীগো আৰম্ভ কৰিব বুলি বিবৃতিটোত জনায়।