চিমেণ্ট কঢ়িওৱা ট্ৰাকৰ খুন্দাত বৰবাৰীৰ এজন যুৱকৰ মৃত্যু

মঙলবাৰে চন্দ্ৰপুৰৰ প্ৰাগজ্যোতিষপুৰ থানাৰ সমীপত সংঘটিত হোৱা শোকাৱহ পথ-দুৰ্ঘটনাৰ ফলত এজন যুৱকৰ মৃত্যু হয়। জানিব পৰা মতে, গুৱাহাটীৰ বৰবাৰীৰ বাসিন্দা দেৱ ৰহাঙৰ পুত্ৰ দুলু ৰহাং ভোগালী বিহুৰ বাবে ঠাকুৰকুছি গাঁৱৰ শহুৰেকৰ ঘৰলৈ আহিছিল। তেওঁ পৰিয়ালৰ সদস্য কেইজনক শহুৰেকৰ ঘৰত থৈ  বন্ধু এজনৰ মটৰ চাইকেলেৰে গোৱৰ্ধন বজাৰলৈ মোবাইল ক্ৰয় কৰিবলৈ ওলাই আহিছিল। কিন্তু গোৱৰ্ধনৰ পৰা উভতি আহি থকা অৱস্থাতে নাৰেংগীৰ পৰা চন্দ্ৰপুৰ অভিমুখী তীব্ৰবেগীৰে অহা চিমেণ্ট কঢ়িওৱা এ এছ-০১/ডি চি-০৯৬৩ নম্বৰৰ এখন ট্ৰাকে মটৰ চাইকেলখনক  খুন্দামৰাত দুলু ৰহাং ট্ৰাকখনৰ চকাৰ তলত সোমাই যায়। ফলত যুৱকজনৰ থিতাতে মৃত্যু হয়। চিমেণ্ট কঢ়িওৱা ট্ৰাকখনে দুৰ্ঘটনাটো সংঘটিত কৰিয়ে পলায়ন কৰে যদিও একাংশ লোকে ট্ৰাকখনক পিছে পিছে গৈ চন্দ্ৰপুৰ বাগিছাত জব্দকৰে। অৱশ্যে ট্ৰাকখনৰ চালকজন ঘটনাস্থলীৰ পৰা পলাই যাবলৈ সক্ষম হয়। আৰক্ষীয়ে ট্ৰাকখন জব্দ কৰাৰ লগতে নিহত যুৱকজনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰে। ঘটনা সন্দৰ্ভত আৰক্ষীয়ে এটা গোচৰ ৰুজু কৰি তদন্ত অব্যাহত ৰাখিছে।