চুক্তি স্বাক্ষৰিত হোৱাৰ ৩২ বছৰৰ পিছত মুকলি কৰা হ’ল অসম চুক্তি ৰূপায়ণ কাৰ্য্যলয়

সময়ৰ হিচাপেৰে অসম চুক্তি স্বাক্ষৰিত হোৱা আজি ৩২ বছৰ হ’ল। ৩২ বছৰৰ পিছত আজি অসম চুক্তি ৰূপায়ণৰ কাম-কাজ তদাৰকৰ বাবে নিৰ্দিষ্ট এটা কাৰ্য্যলয় স্থাপন কৰা হ’ল। খানাপাৰাৰ পশু চিকিৎসা মহাবিদ্যায় প্ৰাংগণত এই কাৰ্য্যালয়টো আজি মুকলি কৰে মুখ্য মন্ত্ৰী সৰ্বানন্দ সোণোৱালে, যিজন অসম চুক্তি ৰূপায়ণ বিভাগৰো দায়িত্বত আছে। ইমান দিনে এই সম্পৰ্কীয় কাম-কাজ গৃহ বিভাগৰ কাৰ্য্যালয়ৰ পৰাই চলাই থকা হৈছিল। এই বিভাগটোৱে এটা সমন্বয়ৰক্ষী বিভাগৰ দৰে কাম কৰে। ঘাইকৈ ই অসম চুক্তিৰ বিভিন্ন দফাবোৰ ৰাজ্য চৰকাৰৰ বিভিন্ন বিভাগে কেনেকৈ ৰূপায়ণ কৰিছে, বা এইবোৰৰ ৰূপায়ণ কি পৰ্য্যায়ত আছে ইত্যাদি দিশবোৰ চোৱাচিতা কৰে। তাৰোপৰি আছু তথা অসম চুক্তি ৰূপায়ণৰ সৈতে জড়িত থকা কেন্দ্ৰীয় চৰকাৰৰ বিভিন্ন মন্ত্ৰ্যালয়ৰ সৈতে সম্পৰ্ক ৰক্ষা কৰে। অনুষ্ঠানটোত মুখ্য মন্ত্ৰীৰ লগতে  উপস্থিত আছিল মন্ত্ৰী হিমন্ত বিশ্ব শৰ্মা, চন্দ্ৰমোহন পাটোৱাৰী, ৰাজ্যিক বিজেপিৰ সভাপতি ৰঞ্জিতকে আদি কৰি ভালেকেইজন নেতা-বিষয়া।

উল্লেখযোগ্য যে চুক্তিখন স্বাক্ষৰিত হোৱাৰ পিছত যোৱা তিনিদশকৰো অধিক দিন অসম চুক্তিক লৈ বিভিন্ন জল্পনা-কল্পনা, বিভিন্ন দাবী-দাবা পাৰ হৈ গৈছে। ৰাজনীতিও কৰা হ’ল বহুত। এটা প্ৰধান পক্ষ হিচাপে থাকি চুক্তিখন কৰা অসম আন্দোলনৰ নেতাসকলেৰে গঠিত তথা নিজকে আঞ্চলিকতাবাদী বুলি দাবী কৰা ৰাজনৈতিক দল অগপই একাধিকবাৰ চৰকাৰো গঠন কৰিলে। কংগ্ৰেছ আহিল শাসনলৈ কেইবাবাৰো। কিন্তু ৰাজনীতিৰ বাদে বিশেষ একো নহ’ল। এইবাৰ বিজেপিৰ পাল। লগত অৱশ্যে আছে মিত্ৰ দল হিচাপে অগপ, যাৰ মূল উদ্দেশ্য আছিল অসম চুক্তিৰ জৰিয়তে তেওঁলোকৰ প্ৰয়োজনীয় দাবীবোৰ ৰূপায়ণ কৰা। আজি অসম আন্দোলনৰ চহিদসকলক সোঁৱৰা দিনটোত তেওঁলোকে পুনৰ অসম চুক্তিলৈ মনত পেলোৱাৰ সুযোগ পালে। চৰকাৰত থকাৰ সুবাদতে নিজে দুই-তিনিবাৰকৈ শাসনভাৰ লৈও এই চুক্তিক সঠিকভাৱে ৰূপায়ণ কৰিব নোৱৰা গ্লানিক সামান্যভাৱে হ’লেও মচি দিয়াৰ সুযোগ পালে অগপই।