প্ৰাক্তন ভাৰতীয় ফুটবল দলৰ অধিনায়ক তথা দুৰ্দান্ত ষ্ট্ৰাইকাৰ বাইছুং ভূটীয়াক আগন্তুক সন্তোষ ট্ৰফীৰ বাবে ছিকিম দলৰ দায়িত্বভাৰ অৰ্পণ কৰিছে ছিকিম ফুটবল সন্থাই। বৰ্তমান প্ৰাক্তন ফুটবলাৰগৰাকীয়ে SFA কাৰিকৰী উপদেষ্টা হিচাপে কাৰ্যনিৰ্বাহ কৰি আছে।
পাটনাত অনুষ্ঠিত হ’বলগীয়া প্ৰতিযোগিতাখনত পূব মণ্ডলক প্ৰতিনিধিত্ব কৰা ছিকিমৰ গ্ৰুপত বিহাৰ আৰু উৰিষ্যাই প্ৰতিদ্বণ্ডিতা আগবঢ়াব। ইয়াৰ উপৰি পূব মণ্ডলৰহৈ যোৱা বছৰৰ চেম্পিয়ন দল বেংগলৰ লগতে চত্তিছগড় আৰু ঝাৰখণ্ডেও প্ৰতিদ্বণ্ডিতা কৰিব। প্ৰত্যেক গ্ৰুপৰে শীৰ্ষ দুটা দলে চূড়ান্ত পৰ্যায়ৰ ৰাউণ্ডত প্ৰৱেশ কৰিব।
উল্লেখ্য যে বাইছুং ভূটীয়া বিগত কিছু দিনৰ পৰা ছিকিম ফুটবলৰ সৈতে জড়িত হৈ আছিল আৰু প্ৰথমবাৰৰ বাবে প্ৰশিক্ষকৰ দৰে গুৰু দায়িত্ব গ্ৰহণ কৰিব।
‘হয়, মই ছিকিম ফুটবল দলৰ প্ৰশিক্ষক হিচাপে দায়িত্বভাৰ ল’বলৈ সিদ্ধান্ত লৈছো’, প্ৰাক্তন ভাৰতীয় ষ্ট্ৰাইকাৰগৰাকীয়ে এই বুলি সংবাদ মাধ্যমৰ আগত প্ৰকাশ কৰে।
‘এই বছৰ মই ছিকিম ফুটবল সন্থাৰ লগত জড়িত হৈ স্থানীয় ফুটবল প্ৰতিযোগিতা আয়োজনত মনোনিৱেশ কৰিছিলো। ইয়াৰ পূৰ্বে এনেধৰণৰ ডাঙৰ প্ৰতিযোগিতা কোনেও আয়োজন কৰা নাই আৰু এয়া আমাৰ বাবে এক বৃহৎ সফলতা’, এনেদৰে কয় প্ৰাক্তন খেলুৱৈগৰাকীয়ে। .
