ছৰছ (SARAS) ২০১৭ৰ সফল সামৰণি

১১-১২ ডিচেম্বৰৰ পৰা গুৱাহাটীৰ ছয়মাইলৰ গণেশ মন্দিৰ ইন্দ’ৰ ষ্টেডিয়ামত অনুষ্ঠিত হৈ অহা গ্ৰাম্য হস্ত শিল্পী সমাজৰ দ্বাৰা নিৰ্মিত সামগ্ৰীৰ বিক্ৰী মেলা (SARAS) ২০১৭ আজি সামৰণি পৰে।  কেইবাটাও আত্মসহায়ক গোট আৰু উদ্যোগীয়ে উক্ত মেলাখনত অংশ গ্ৰহণ কৰি তেওঁলোকৰ দ্বাৰা নিৰ্মিত সামগ্ৰী সমূহ প্ৰদৰ্শন কৰে। অসম ৰাজ্যিক গ্ৰাম্য জীৱিকা অভিযান (ASRLM)ৰ দ্বাৰা আয়োজিত উক্ত মেলাত দেশৰ মুঠ ১৭ খন ৰাজ্যই অংশ গ্ৰহণ কৰে।

আজি শেষ হোৱা মেলাখনৰ সামৰণি অনুষ্ঠানত সামগ্ৰী বিক্ৰীৰ জৰিয়তে ৫ লাখতকৈ অধিক টকা উপাৰ্জন কৰিবলৈ সক্ষম হোৱা  অসমৰ চন্দ্ৰপুৰ অঞ্চলৰ লক্ষ্মী আত্মসহায়ক গোটক সৰ্বাধিক বিক্ৰী কৰা বিপণীৰ  সন্মানেৰে পুৰস্কৃত কৰা হয়। হাতে বোৱা বিক্ৰী কৰা আত্মসহায়ক গোটটোৰ সদস্য নমিতা আবঙে কয় যে তেওঁলোকে প্ৰস্তুত কৰা সামগ্ৰী সমূহত ছালৰ অনুকুল হোৱাকৈ  সম্পূৰ্ণ প্ৰাকৃতিক ৰং ব্যৱহাৰ কৰে। ‘আমাৰ সামগ্ৰী সমূহৰ প্ৰতি ৰাইজে যথেষ্ট ভাল সঁহাৰি জনাইছে।’ আবঙে লগতে কয়। উল্লেখযোগ্য যে ১১ গৰাকী মহিলা সদস্যৰে গঠিত উক্ত আত্মসহায়ক গোটটোৱে ইতিমধ্যে দিল্লীত আয়োজিত ভাৰত আন্তৰ্জাতিক বাণিজ্য মেলাত একেৰাহে ৪ বছৰ ধৰি তেওঁলোকৰ সামগ্ৰী সমূহ প্ৰদৰ্শন কৰি আহিছে।

সামৰণি অনুষ্ঠানটোত অংশ গ্ৰহণ কৰি অসম ৰাজ্যিক গ্ৰাম্য জীৱিকা অভিযানৰ প্ৰকল্প সঞ্চালক নন্দিতা শইকীয়াই কয় যে আত্মসহায়ক গোটসমূহে ভৱিষ্যতে আৰু বেছি উৰ্পাজন কৰিবলৈ হ’লে তেওঁলোকে প্ৰস্তুত কৰা সামগ্ৰী সমূহত বৈচিত্ৰ আনিব লাগিব। মেলাখনত আন আন আত্ম সহায়ক গোট যেনে গুজৰাটৰ পৰা অহা শ্ৰীকৃষ্ণ আত্মসহায়ক গোট, অসমৰ সঞ্জীৱনি আত্মসহায়ক গোট, গোৱাৰ কৃষি শক্তি আদিয়েও যথেষ্ট ভাল উপাৰ্জন কৰে।