‘জগদম্বা মালেৰ প্ৰস্তাৱৰ যোগেদি অসম চৰকাৰ আৰু কেন্দ্ৰীয় চৰকাৰে পৰীক্ষা কৰিছিল যে এনেকুৱা ধৰণৰ প্ৰস্তাৱে অসমত কেনেকুৱা পৰিস্থিতিৰ সৃষ্টি কৰিব পাৰে।’ নাগা চুক্তিক লৈ সমগ্ৰ অসম বিশেষকৈ ডিমা হাচাও উত্তপ্ত হৈ থকাৰ মাজতে আজি চৰকাৰৰ বিৰুদ্ধে এই বিস্ফোৰক অভিযোগ উত্থাপন কৰে সদৌ ডিমাচা ছাত্ৰ সংস্থাৰ নেতা প্ৰফুল্ল হাফিলাই।
মানৱ অধিকাৰ সংগ্ৰাম সমিতিয়ে মাইবাঙৰ ঘটনাৰ গৰিহণা দি আজি গুৱাহাটী প্ৰে’ছ ক্লাবত আয়োজন কৰা নাগৰিক সভাত উপস্থিত থাকি এইদৰে মত প্ৰকাশ কৰে ডিমাচা ছাত্ৰ নেতাজনে।
ডিমাচাসকল অসমৰ ভূমি ৰক্ষাৰ বাবে ভৱিষ্যতলৈও মৃত্যুক সাবটি ল’বলৈ প্ৰস্তুত বুলি উল্লেখ কৰি নেতাজনে লগতে কয়, ‘২০১৫ চনৰ ৩ আগষ্টৰ পৰা বৰ্তমানলৈকে কি কাৰণত কেন্দ্ৰীয় চৰকাৰে নাগা ফ্ৰে’মৱৰ্ক চুক্তিখন ৰাজহুৱা কৰা নাই তাক লৈ ডিমা হাচাওবাসী চিন্তিত হৈ আছে।’
আৰক্ষীয়ে গুলীচালনাৰ পূৰ্বে কোনোধৰণৰ সতৰ্কীকৰণ প্ৰদান নকৰাৰ অভিযোগ কৰি তেওঁ কয়, ‘প্ৰতিবাদকাৰীয়ে মোক জনোৱা অনুসৰি আৰক্ষীয়ে যুৱক দুজনক একেবাৰে ওচৰৰ পৰা গুলিয়াইছিল। আৰক্ষীয়ে শূন্যলৈ গুলীচালনা কৰা নাছিল।’
ভাষণ প্ৰসংগত নেতাজনে মাইবাং কাণ্ডৰ বাবে তেওঁলোকক সমৰ্থন জনোৱা সকলোকে ধন্যবাদ জ্ঞাপন কৰি এই সমৰ্থনে তেওঁলোকক বুকুত অলপ সাহস যোগোৱা বুলিও উল্লেখ কৰে।
আনহাতে নাগৰিক সভাখনত উপস্থিত থকা গুৱাহাটী উচ্চ ন্যায়ালয়ৰ অধিবক্তা তথা মানৱ অধিকাৰ কৰ্মী অৰূপ বৰবৰাই কয়, ‘ডিমা-হাচাওক নাগালেণ্ডত অন্তৰ্ভুক্তিকৰণৰ বিৰোধিতা কৰা অসমৰ ভূমি পুত্ৰসকলৰ আন্দোলনত দুজনকৈ যুৱকে আৰক্ষীৰ নিৰ্বিচাৰ গুলীত প্ৰাণ হেৰুৱাব লগা হোৱা ঘটনাৰ বাবে প্ৰধানতঃ দায়ী সৰ্বানন্দ সোণোৱালৰ গৃহ বিভাগৰ লগতে কেন্দ্ৰীয় চৰকাৰৰ গৃহ বিভাগ।’
বৰবৰাই কয়, ‘এওঁলোকৰ পিছতহে ডিমা-হাচাওৰ উপায়ুক্ত আৰু গুলী চলোৱা আৰক্ষী অধীক্ষকজনক দোষাৰোপ কৰিব খোজো।’
নাগাসকলে স্বভূমি দাবী কৰাতো তেওঁলোকৰ আত্মনিয়ন্ত্ৰণৰ অধিকাৰ বুলি উল্লেখ কৰি বৰবৰাই বিষয়টো সমাধানৰ নামত যাতে চুবুৰীয়া ৰাজ্যৰ জনসাধাৰণৰ ভূমি, খেতিবাতি তথা আৱাসগৃহ ক্ষতিগ্ৰস্ত নহয় তাৰ ওপৰত দৃষ্টি ৰাখিবৰ বাবে চৰকাৰক আহ্বান জনায়।
সৰ্বানন্দ সোণোৱালে প্ৰতিটো মুহূৰ্ততে এক ইঞ্চি মাটি বেলেগক নিদিওঁ বুলি কোৱা মন্তব্যক মহাভাৰতৰ দুৰ্য্যোধনৰ কথাৰ সৈতে তুলনা কৰি বৰবৰাই নগা চুক্তি স্বাক্ষৰিত হোৱাৰ পিছত বৰ্তমান নগাৰ আগ্ৰাসনত থকা অঞ্চলসমূহৰ অৱস্থা কি হ’ব সেই বিষয়ে সৰ্বানন্দ সোণোৱাল চৰকাৰে কোনো মন্তব্য নকৰাৰ কথা উল্লেখ কৰে।
কোনো নিৰাপত্তাজনিত, ৰণনীতি, অপৰাধমূলক অথবা পাৰমাণৱিক অস্ত্ৰ-শস্ত্ৰৰ তথ্য নোহোৱা এই চুক্তি ৰাজহুৱা কৰাৰ পৰা কেন্দ্ৰীয় চৰকাৰ কিয় বিৰত আছে বুলি প্ৰশ্ন তুলি বৰবৰাই কয় যে কেন্দ্ৰীয় চৰকাৰে নিৰ্বাচনত আসন লাভ কৰাৰ স্বাৰ্থত অসম তথা উত্তৰ-পূৰ্বাঞ্চলৰ লোকসকলক ভিতীগ্ৰস্ততাৰ মাজত ৰাখি এই চুক্তিখন প্ৰকাশৰ দিন পিছুৱাই আছে।
তেওঁ লগতে অভিযোগ উত্থাপন কৰে যে হিন্দু বাংলাদেশীৰ প্ৰসংগতো তল পেলাবৰ বাবেও কেন্দ্ৰীয় চৰকাৰখন এনেধৰণৰ ষড়যন্ত্ৰত লিপ্ত হৈছে।
অসম সংগ্ৰামী মঞ্চৰ হৈ সভাত উপস্থিত থকা ড০ নৱনীল বৰুৱাই উল্লেখ কৰে যে ডিমাচাসকলো অসমীয়াই আৰু আমাৰ মাজত থকা সংকীৰ্ণতা আমি দূৰ কৰিব লাগিব। মাইবাঙৰ ঘটনা সমগ্ৰ অসমৰ বাবে এক আঘাত।
তেওঁ কয় আৰ এছ এছ নেতা জগদম্বা মালেই প্ৰস্তুত কৰা খচৰাৰ ভাষাটোলৈ চাই বুজিব পাৰি যে এই খচৰাখনৰ ভিত্তি আছে।
এই ঘটনাৰ সৈতে এক ষড়যন্ত্ৰ জড়িত থকাৰ অভিযোগ তুলি তেওঁ কেন্দ্ৰীয় চৰকাৰে বক্ৰ পথেৰে ইয়াক ৰাইজৰ মাজলৈ ঠেলি দিছে বুলি উল্লেখ কৰে।
