চোৰাং চিকাৰীৰ ওপৰত কঠোৰ ব্যৱস্থা গ্ৰহণেৰে অসমত গঁড়ৰ লগতে আন বন্যপ্ৰাণী সুৰক্ষাৰ অন্যতম প্ৰতিশ্ৰুতিৰে শাসনলৈ অহা বিজেপি চৰকাৰৰ শাসনত এইবাৰ বন বিভাগে নহয়, ওলোটাই চোৰাং চিকাৰীয়ে অভিযানকাৰী বনকৰ্মীৰ দলৰ ওপৰত আক্ৰমণ কৰাৰ ঘটনা ঘটিছে।
তিনিচুকীয়া জিলাৰ ডিগবৈ বন সংমণ্ডলৰ অধীনৰ জাগুন আঞ্চলিক বন বিষয়া কাৰ্য্যালয়ৰ অন্তৰ্গত টিংকুপানী সংৰক্ষিত বনাঞ্চলত আজি ১৮ জুলাইত বনকৰ্মীৰ ওপৰতে ভয়ংকৰ গুলীবৰ্ষণ কৰি পলাই যায় ১০ জনকৈ চোৰাংচিকাৰী।
‘আমাৰ অভিযানকাৰী দলটোক উদ্দেশ্যি প্ৰথমে চোৰাং চিকাৰীসকলে গুলী চালনা কৰে। প্ৰত্যুত্তৰত আমিও চোৰাংচিকাৰীৰ দলটোলৈ লক্ষ্য কৰি গুলী চালনা কৰো যদিও ১০ জনীয়া চোৰাংচিকাৰীৰ দলটো উক্ত স্থানৰ পৰা পলায়ন কৰিবলৈ সক্ষম হয়,’ নৰ্থ ইষ্ট নাও-ক জনাই বন বিভাগৰ এক সূত্ৰই।
গুলীয়াগুলীত দুজনকৈ চোৰাংচিকাৰী আহত হোৱা বুলিও বন বিভাগৰ সূত্ৰই দাবী কৰিছে।
পিছত বনকৰ্মীসকলে চোৰাংচিকাৰীৰ শিবিৰটো উৎখাত কৰাৰ লগতে শিবিৰটোৰ পৰা ৬ টাকৈ হস্ত নিৰ্মিত বন্দুক, টৰ্চ লাইটকে ধৰি বহু সামগ্ৰী উদ্ধাৰ কৰে।
টিংকুপানী সংৰক্ষিত বনাঞ্চলৰ পৰা ওলাই গৈ নামফাই সংৰক্ষিত বনাঞ্চলত কিছুদিন পূৰ্বে মৃত্যু হোৱা গুলীবিদ্ধ হাতীটো এই চোৰাংচিকাৰীৰ দলটোৱেই গুলীউৱা বুলি সন্দেহ কৰা হৈছে বুলি বন বিভাগৰ সূত্ৰত প্ৰকাশ।
চোৰাংচিকাৰীৰ দলটো অৰুণাচল প্ৰদেশৰ বুলি বন বিভাগে সন্দেহ প্ৰকাশ কৰিছে।
