এখন চৰকাৰী প্ৰাথমিক বিদ্যালয়। বিদ্যালয়খনৰ পৰিবেশ দেখিলে আপোনাৰ মনত পৰিব ১৯ বিংশ শতিকালৈ। বিদ্যালয়খনৰ ছাত্র-ছাত্রীৰ পঢ়া-শুনা ব্যৱস্থাই প্ৰত্যাহ্বান জনাইছে নৰেন্দ্ৰ মোদীৰ ডিজিটেল ইণ্ডিয়া আৰু সৰ্বানন্দৰ এডভান্স আসামক।
হয়, এয়া নগাঁও জিলাৰ বঢ়মপুৰ বিধান সভা সমষ্টিৰ অন্তৰ্গত আৰু ৰূপহী শিক্ষাখণ্ডৰ অধীনৰ বালিজুৰি তিনিআলি চৰকাৰী প্ৰাথমিক বিদ্যালয়ৰ ছবি। বিদ্যালয়খনত কি ঘটিছে সেয়া শিক্ষা বিভাগত উন্নয়নৰ ঢাক-ঢোল বজোৱা চৰকাৰখনে হয়তো খবৰ ল’বলৈ সময় নাপায়।
উল্লেখ্য যে আজিৰ তাৰিখত এটা জুপুৰি সদৃশ ঘৰত পাঁচটাকৈ শ্ৰেণী কোঠাত শিক্ষা দান কৰিছে দুজন শিক্ষকে। ছাত্র-ছাত্রীৰ বাবে নাই সু-আন্তঃগাঁথনি। ডিজিটেল ইণ্ডিয়া বা এডভাঞ্চ আচামে ঢুকি নোপোৱা এইখন বিদ্যালয়ত মাটিত বস্তা পাৰি শিক্ষা গ্ৰহণ কৰিছে শিক্ষাৰ্থীয়ে।
চৰকাৰী বিদ্যালয়ৰ এনে দুৰৱস্থাই ছাত্র-ছাত্রীক কেনেকৈ মানৱ সম্পদ ৰূপে গঢ়িব ই এতিয়া কোটি টকীয়া প্ৰশ্ন। এনে অৱস্থাত অভিভাৱকসকল চৰকাৰী বিদ্যালয়ৰ পৰিৱৰ্তে কিয় বাৰু ব্যক্তিগত বিদ্যালয়লৈ ধাৱমান নহ’ব বুলিও সচেতন মহলে মতপোষণ কৰিছে।
এনেবোৰ শিক্ষাব্যৱস্থাৰ পৰা চৰকাৰী বিদ্যালয় সমূহক মুক্ত কৰিবলৈ চৰকাৰে কিবা পদক্ষেপ গ্ৰহণ কৰিবনে সেয়া লৈ এতিয়া সচেতন মহলৰ মাজত প্ৰশ্নৰ উদয় হৈছে।
