ডিব্ৰুগড় বিশ্ববিদ্যালয়ৰ স্নাতক পৰীক্ষাৰ ফলাফল ঘোষণা
ডিব্ৰুগড় বিশ্ববিদ্যালয়ৰ অন্তৰ্গত স্নাতক কলা, বিজ্ঞান আৰু বাণিজ্য শাখাৰ চূড়ান্ত পৰীক্ষাৰ ফলাফলসমূহ ঘোষণা কৰা হৈছে। শনিবাৰে ঘোষণা কৰা ফলাফল অনুসৰি কলা, বিজ্ঞান আৰু বাণিজ্য শাখাত ক্ৰমে অনন্যা ভূঞা, ৰক্তিম নাথ আৰু মানসী আগৰৱালা শ্ৰেষ্ঠ স্নাতক হিচাপে বিবেচিত হৈছে।
উল্লেখযোগ্য যে শনিবাৰে স্নাতক কলা, বিজ্ঞান আৰু বাণিজ্য শাখাৰ ষষ্ঠ, চতুৰ্থ আৰু দ্বিতীয় ষাণ্মাসিকৰ ফলাফল ঘোষণা কৰা হৈছে।
ডিব্ৰুগড় মনোহাৰী দেবী কানৈ মহিলা মহাবিদ্যালয়ৰ অনন্যা ভূঞাই কলা শাখাত ৯১.৮৬ শতাংশ, গোলাঘাটৰ ডি আৰ মহাবিদ্যালয়ৰ ৰক্তিম নাথে বিজ্ঞান শাখাত ৯১.৯৩ শতাংশ আৰু তিনিচুকীয়া জি এছ লোহিয়া মহিলা মহাবিদ্যালয়ৰ মানসী আগৰৱালাই বাণিজ্য শাখাত ৮৩.২৫ শতাংশ নম্বৰেৰে শ্ৰেষ্ঠ স্নাতকৰ খ্যাতি লাভ কৰিছে।
ডিব্ৰুগড় বিশ্ববিদ্যালয়ৰ পৰীক্ষা বিভাগৰ উপপঞ্জীয়ক অৰিঞ্জিত হাজৰিকাই জানিব দিয়ে যে স্নাতক নতুন পাঠ্যক্ৰমৰ শনিবাৰে ঘোষিত কলা, বিজ্ঞান আৰু বাণিজ্য শাখাৰ দ্বিতীয়, চতুৰ্থ আৰু ষষ্ঠ ষাণ্মাসিকৰ পৰীক্ষাত মুঠ ১,২৩,৩০৫গৰাকী পৰীক্ষাৰ্থী অৱতীৰ্ণ হৈছিল। ইয়াৰ ভিতৰত ৫৩.২০২ গৰাকী পৰীক্ষাৰ্থী উত্তীৰ্ণ হৈছে।
তথ্য অনুসৰি ষষ্ঠ ষাণ্মাসিকৰ কলা শাখাত মুঠ ২২,২০৫গৰাকী শিক্ষাৰ্থী অৱতীৰ্ণ হৈছিল। ইয়াৰে ১০,৪১৪গৰাকী উত্তীৰ্ণ হৈছে। উত্তীৰ্ণৰ হাৰ ৪৬.৯০ শতাংশ। আনহাতে, ষষ্ঠ ষাণ্মাসিকৰ বিজ্ঞান শাখাত মুঠ ৪৬৪৬গৰাকী অৱতীৰ্ণ হৈছিল। ইয়াৰে ২০৮১ গৰাকী উত্তীৰ্ণ হৈছে। উত্তীৰ্ণৰ হাৰ ৪৪.৭৯ শতাংশ। সেইদৰে বাণিজ্য শাখাত অৱতীৰ্ণ হোৱা ৩৬৮৮গৰাকী পৰীক্ষাৰ্থীৰ ভিতৰত ১৯২৭ গৰাকী উত্তীৰ্ণ হৈছে। উত্তীৰ্ণৰ হাৰ ৫২.২৫ শতাংশ।
একেদৰে, শনিবাৰে ঘোষিত চতুৰ্থ ষাণ্মাসিকৰ কলা শাখাত ৫৭.৭৪ শতাংশসহ ১৫,৯৯৯গৰাকী, বিজ্ঞান শাখাত ৪৪.০৯ শতাংশসহ ২৬৭০গৰাকী আৰু বাণিজ্য শাখাত ৬৪.৩০ শতাংশসহ ২৯৭৬গৰাকী পৰীক্ষাৰ্থী উত্তীৰ্ণ হৈছে।
তদুপৰি, দ্বিতীয় ষাণ্মাসিকৰ কলা শাখাত ৩০.৫২ শতাংশসহ ১২,৩৮১গৰাকী, বিজ্ঞান শাখাত ৩৬.৫৩ শতাংশসহ ২৮৮৩গৰাকী আৰু বাণিজ্য শাখাত ৩১.৭৬ শতাংশসহ ১৭৭১ গৰাকী পৰীক্ষাৰ্থী উত্তীৰ্ণ হৈছে।