বিগত কিছুদিন ধৰি ড্ৰাগ্ছকে আদি কৰি বিভিন্ন অসামাজিক কাৰ্যৰ বিৰুদ্ধে তীব্ৰ অভিযান চলাইছে নগাঁও আৰক্ষীয়ে।
নগাঁৱৰ আৰক্ষী অধীক্ষক শংকৰব্ৰত ৰায় মেধিয়ে যোগদান কৰাৰ পিছৰে পৰা জিলাখনত ড্ৰাগ্ছ মাফিয়াৰ বিৰুদ্ধে যথেষ্ট সক্ৰিয় ভূমিকা গ্ৰহণ কৰা পৰিলক্ষিত হৈছে।
নগাঁৱৰ আৰক্ষী অধীক্ষক হিচাপে এইগৰাকী বিষয়াই যোগদান কৰাৰ প্ৰায় দুমাহৰ ভিতৰতে আৰক্ষীয়ে বৰ্তমানলৈকে ৬২৪১ বটল নিচাযুক্ত ঔষধ আৰু ২৫১১৩ টেবলেট জব্দ কৰিছে।
আনহাতে আৰক্ষীয়ে বৰ্তমানলৈকে আঠজন ড্ৰাগ্ছ ব্যৱসায়ীক গ্ৰেপ্তাৰ কৰিছে। গ্ৰেপ্তাৰ কৰা ড্ৰাগ্ছ মাফিয়াকেইজন হৈছে আবজৰ আলী, অঞ্জলি শইকীয়া, গোপাল দাস, বিজু দাস, আমিৰুদ্দিন, জিয়াউদ্দিন, জহৰ আলী আৰু ছফিকুল ইছলাম।
উল্লেখ্য যে ইয়াৰে ছফিকুল ইছলামক যোৱা শনিবাৰে নিশা গ্ৰেপ্তাৰ কৰে আৰক্ষীয়ে। শনিবাৰে নিশা এক বিশেষ সূত্ৰৰ খবৰৰ ভিত্তিত আৰক্ষীয়ে নগাঁও চহৰৰ সমীপৰ মৰঙিয়ালৰ ৰফিকুল ইছলামৰ ঘৰত অভিযান চলাই বুজন পৰিমাণৰ নিচাযুক্ত ঔষধ জব্দ কৰে।
আৰক্ষীয়ে ৰফিকুলৰ ঘৰৰপৰা ১৯০০টা টেবলেট আৰু ৩০৭ বটল নিচাযুক্ত ঔষধ জব্দ কৰিবলৈ সক্ষম হয়। অৱশ্যে ৰফিকুলে আৰক্ষীৰ চকুত ধূলি দি পলাই যায়।
ইতিমধ্যে তেওঁৰ বিৰুদ্ধে নগাঁও আৰক্ষীয়ে গোচৰ ৰুজু কৰি অভিযান অব্যাহত ৰাখিছে।
আনহাতে শনিবাৰে নিশা নগাঁও আৰক্ষীয়ে চি আৰ পি এফৰ সহযোগত চহৰখনৰ মাজৰআটিৰ গোশালাৰ ওচৰত অভিযান চলাই ছফিকুল ইছলাম (৩৬) নামৰ এজন কুখ্যাত ড্ৰাগ্ছ মাফিয়াক কৰায়ত্ত কৰে।
আৰক্ষীয়ে তেওঁৰ মেটিজখনো জব্দ কৰি গাড়ীখনৰ ভিতৰৰ পৰা ৩৮৮৮টা টেবলেট আৰু ১৯২ বটল নিচাযুক্ত ঔষধ জব্দ কৰে।
ধৃত ড্ৰাগ্ছ মাফিয়াজনে নিচাযুক্ত ঔষধখিনি বিক্ৰীৰ বাবে গাড়ীখনেৰে কঢ়িয়াই আনোতেই এইদৰে আৰক্ষীৰ জালত পৰে। তেওঁৰ ঘৰ নগাঁও চহৰৰ সমীপৱৰ্তী মধুপুৰত বুলি জানিব পৰা গৈছে।
ড্ৰাগ্ছৰ বিৰুদ্ধে আৰক্ষীয়ে গ্ৰহণ কৰা স্থিতিক আদৰণি জনাইছে ৰাইজে।
