ঢেকীয়াজুলিত এপষেকৰ ভিতৰতে পুনৰ ছাত্ৰীক অপহৰণৰ চেষ্টা অ’টো চালকৰ : চলন্ত অট’ৰ পৰা জঁপিয়াই ৰক্ষা পৰিল দুই ছাত্ৰী
কেইদিনমান পূৰ্বে ঢেকীয়াজুলিৰ লোকনায়ক অমিয় কুমাৰ দাস মহাবিদ্যালয়ৰ উচ্চতৰ মাধ্যমিকৰ পৰীক্ষা দিবলৈ অহা ছাত্ৰীক অপহৰণৰ চেষ্টা কৰা দুজন অট’চালকক আৰক্ষীয়ে গ্ৰেপ্তাৰ কৰি জেইল হাজোতলৈ প্ৰেৰণ কৰাৰ ঘটনা মাৰ নৌ যাওঁতেই মঙলবাৰে একে ধৰণৰ এটা ঘটনাই ঢেকীয়াজুলিৰ ৰাইজক উদ্বিগ্ন কৰি তুলিছে।
জানিব পৰামতে ২৭ মাৰ্চৰ পুৱাৰ ভাগত কেহেৰুখন্দা পথাৰৰ দুগৰাকী ছাত্ৰীয়ে ঢেকীয়াজুলি চহৰলৈ টিউশ্যনলৈ বুলি ১৫ নং ৰাষ্ট্ৰীয় ঘাইপথৰ ডাংগাবস্তিত অট’ৰ বাবে ৰৈ আছিল। তেনেতে এখন অট’ আহি ছাত্ৰী দুগৰাকীৰ ওচৰত ৰয় আৰু চালকে তেওঁলোকক উঠিবলৈ কয়।
কিন্তু ছাত্ৰী দুয়োগৰাকী অট’খনত উঠাৰ লগে লগে অট’ চালকে অ’টোখন ঢেকিয়াজুলি চহৰ অভিমুখে নিয়াৰ সলনি বিপৰীতে দিশে, অৰ্থাৎ তেজপুৰ অভিমুখে বেগেৰে চলাই নিয়ে। ছাত্ৰী দুগৰাকী শংকিত হৈ চিঞৰ-বাখৰ কৰা সত্ত্বেও অট’ চালকজনে অট’খন ৰখোৱা নাছিল। শেষত দুয়োগৰাকী ছাত্ৰীয়ে চলন্ত অট’খনৰ পৰা জঁপিয়াই দিয়ে। এইদৰেই ছোৱালী দুগৰাকী কোনোমতে নিজৰ প্ৰাণ ৰক্ষা কৰিবলৈ সক্ষম হয়।
জানিব পৰামতে ঘটনা সংঘটিত কৰি অট’চালকজনে অট’সহ ঘটনাস্থলীৰ পৰা পলায়ন কৰে। দুয়োগৰাকী কিশোৰী ঢেকীয়াজুলি উচ্চতৰ মাধ্যমিক বালিকা বিদ্যালয়ৰ নৱম শ্ৰেণীৰ ছাত্ৰী। এই সন্দৰ্ভত ভুক্তভোগী ছাত্ৰী দুগৰাকীয়ে সমস্ত ঘটনা বিৱৰি ঢেকীয়াজুলি আৰক্ষী থানাত এজাহাৰ দাখিল কৰিছে।
উল্লেখযোগ্য যে যোৱা ১৩ মাৰ্চত তেজপুৰৰ চাৰিমাইলৰ এখন ব্যক্তিগত খণ্ডৰ বিদ্যালয়ৰ চৌহদৰ পৰাই আৰু শ্ৰেণীসমূহ চলি থকা অৱস্থাতে পঞ্চম আৰু ষষ্ঠ শ্ৰেণীৰ দুগৰাকীকৈ ছাত্ৰীক এজন অট’ চালকে অপহৰণ কৰি নিয়াৰ চেষ্টা কৰিছিল। পিছত আৰক্ষীৰ তৎপৰতাত ছাত্ৰী দুগৰাকীক অট’চালকজনৰ পৰা উদ্ধাৰ কৰা হৈছিল।