৬০ জনীয়া সদস্যৰে গঠিত ত্ৰিপুৰা বিধানসভা নিৰ্বাচনৰ বাবে শাসকীয় বাম ফ্ৰণ্টে মঙলবাৰে ইয়াৰ প্ৰাৰ্থী তালিকা প্ৰকাশ কৰিছে। এইবাৰৰ নিৰ্বাচনত ১০খন নতুন মুখৰ উপৰি ৭ গৰাকী মহিলা প্ৰাৰ্থীয়ে প্ৰতিদ্বন্দ্বিতা আগবঢ়াব।
মঙলবাৰে বাম ফ্ৰণ্টৰ নেতৃবৃন্দৰ উপস্থিতিত চিপিআই(এম)ৰ ৰাজ্যিক সম্পাদক তথা বাম ফ্ৰণ্টৰ নৱ নিৰ্বাচিত আহ্বায়ক বিজন ধৰে চিপিআই(এম)ৰ ৫৭ জন সদস্যৰ লগতে সহযোগী দল আৰএছপি, চিপিআই আৰু এফবিৰ একোজনকৈ সদস্যৰে গঠিত প্ৰাৰ্থী তালিকাখন ঘোষণা কৰে।
মন কৰিব লগীয়া যে, ২০১৩ চনৰ বিধানসভা নিৰ্বাচনত সহযোগী বাম দলকেইটাক ৫ খন আসন দিয়া হৈছিল। ইয়াৰে চিপিআইক দুখন, আৰএছপিক দুখন আৰু ফৰৱাৰ্ড ব্লকক এখন আসন দিয়া হৈছিল।
ধৰৰ মতে জয়ী হোৱাৰ পূৰ্ণ সম্ভাৱনা থকাৰ ভিত্তিত প্ৰাৰ্থীসকলক নিৰ্বাচন কৰা হৈছে।
বাম ফ্ৰণ্টৰ ৬০ জন প্ৰাৰ্থীৰ ভিতৰত বৰজালা সমষ্টিৰ ৩৫ বছৰীয়া ঝুমু সৰকাৰ কনিষ্ঠতম প্ৰাৰ্থী হোৱাৰ বিপৰীতে ৭৯ বছৰ বয়সীয়া চাওমানু সমষ্টিৰ নিৰাজয় ত্ৰিপুৰা আটাইতকৈ জ্যেষ্ঠ প্ৰাৰ্থী।
আনহাতে প্ৰথমবাৰৰ কাৰণে চিপিআই(এম)এ নিৰ্বাচনৰ পূৰ্বেই মুখ্য মন্ত্ৰী প্ৰাৰ্থী হিচাপে মাণিক সৰকাৰক প্ৰক্ষেপ কৰিছে।
১৮ ফেব্ৰুৱাৰিত হ’বলগীয়া নিৰ্বাচনটোত বাম ফ্ৰণ্টে শান্তি অাৰু সম্প্ৰীতিক নিৰ্বাচনী বিষয় হিচাপে লৈ যুঁজত নামিব বুলি ধৰে জানিবলৈ দিয়ে।
