বিগত চাৰিবছৰ আগতেই কৰ্মসুত্ৰে ঘৰৰ পৰা ওলাই গৈছিল নগাওঁ জিলাৰ কলিয়াবৰ মহকুমাৰ এজন যুৱক। কলিয়াবৰৰ মাধতাৰি গাঁৱৰ নিবাসী জয় কাকতীৰ পুত্ৰ অৰূপ কাকতী(২২) নামৰ যুৱকজন ২০১৩ চনতে দুজন বন্ধুৰ সৈতে ব্যক্তিগত কোম্পানী এটাত কাম কৰাৰ উদ্দেশ্যে দিল্লীলৈ ৰাওনা হৈছিল। কোম্পানীত কাম কৰি থকাৰ সময়তে দুই বন্ধুৰ এজনে লগ এৰে বুলি অৰূপৰ পিতৃয়ে জানিবলৈ দিয়ে। জানিব পৰা মতে এজন বন্ধুৱে লগ এৰাৰ পিছতে আনজন বন্ধু ভোলা বৰাৰ সৈতে কাম কৰি থকা কোম্পানীৰ সমীপতে এটা ভাড়াঘৰত আছিল। সন্ধানহীন যুৱকজনৰ পিতৃয়ে জানিবলৈ দিয়া মতে দিল্লীত দুবছৰ কাম কৰাৰ পিছত অৰ্থ্যাৎ ২০১৫ চনত অন্য কাম বিচাৰি গুজৰাটলৈ যায়। গুজৰাটৰ পৰা কোম্পানী কতৃপক্ষই অন্য শ্ৰমিকৰ সৈতে অৰূপকো মুম্বাইলৈ কাম কৰিবলৈ পঠিয়ায়। পৰিয়ালৰ লোকে জানিবলৈ দিয়া মতে মুম্বাইলৈ যোৱাৰ সময়লৈকে যুৱকজনৰ লগত পৰিয়ালৰ লোকে ফোনযোগে কথা-বতৰা পাতি আছিল।
কিন্তু তাৰ পিছৰে পৰা অৰূপৰ সৈতে পৰিয়ালৰ লোকে আজি পৰ্যন্ত যোগাযোগ কৰিব পৰা নাই। আনহাতে সন্ধানহীন যুৱকজনৰ বন্ধু ভোলা বৰাই পৰিয়ালৰ লোকে বাৰম্বাৰ ফোন কৰি থাকিলেও ফোন ৰিচিভ নকৰে বুলি অৰূপৰ পিতৃয়ে জানিবলৈ দিয়ে। লক্ষ্যনীয় যে ভোলাই মাজে সময়ে নিজৰ ঘৰলৈ আহে যদিও অৰূপৰ বিষয়ে সুধিলে অন্য মনষ্ক হৈ পৰে। এনে পৰিপ্ৰক্ষিতত অৰূপৰ পৰিয়ালে ভোলাৰ এনে সন্দেহজনক আচৰণত ক্ষোভিত পৰিয়ালৰ লোকে ভোলালৈ সন্দেহৰ আঙুলি টোৱাইছে। এই সন্দৰ্ভত অৰূপৰ পৰিয়ালে কলিয়াবৰ আৰক্ষী থানাত এখন এজাহাৰ দাখিল কৰিছে। ইফালে আৰক্ষীয়ে বহিঃৰাজ্যত সন্ধানহীন যুৱকজনৰ অনুসন্ধান চলাই আছে যদিও বৰ্তমানলৈকে সন্ধান উলিয়াবলৈ সক্ষম হোৱা নাই।
