মহিলা সবলীকৰণৰ ধ্বজা উৰুৱাই থকা চৰকাৰখনে আঁচনিভূক্ত মহিলা কৰ্মচাৰীসকলক বিনা বেতনে কামত খটুৱাই থকাৰ প্ৰতিবাদত আৰু আঁচনিভূক্ত মহিলা কৰ্মচাৰীসকলৰ কেইবাটাও দাবীৰ সমৰ্থনত আজি দেশজুৰি বিক্ষোভ কাৰ্যসূচী ৰূপায়ন কৰে অংগনবাদী কৰ্মী, মধ্যাহ্ন ভোজন কৰ্মী আৰু আশা কৰ্মীসকলে ৷
এই কাৰ্যসূচীৰ অংশ হিচাপে সংগঠনকেইটাৰ নেত্ৰী আৰু কৰ্মীসকলে বৰপেটাটো বিক্ষোভ কাৰ্যসূচী ৰূপায়ন কৰি জিলা উপায়ুক্তৰ জৰিয়তে দেশৰ প্ৰধান মন্ত্ৰীলৈ স্মাৰক পত্ৰ প্ৰেৰণ কৰে ৷ বৰপেটাৰ জিলা উপায়ুক্তৰ কাৰ্যালয়ৰ সমীপৰ মিলেনিয়াম পাৰ্কত দিনৰ প্ৰায় দহ বজাত জিলাখনৰ ভিন্ন প্ৰান্তৰ আঁচনিভূক্ত মহিলা কৰ্মচাৰী উপস্থিত হৈ বিক্ষোভ কাৰ্যসূচী ৰূপায়ন কৰে ৷ প্ৰতিবাদকাৰী মহিলা কৰ্মচাৰীসকলে ” মহিলা কৰ্মচাৰীক অন্যায় কৰা নচলিব”, “বিজেপি চৰকাৰ হায় হায়”, “মাননিৰ সলনি মজুৰি দিয়ক”, “ভাৰতীয় শ্ৰম সন্মিলনৰ 45 সংখ্যক সভাৰ সিদ্ধান্ত কাৰ্যকৰী কৰক” আদি শ্লোগান দি আকাশ বতাহ কপাই তোলে।
প্ৰায় দুই হাজাৰ কৰ্মচাৰীয়ে তিনি ঘন্টা ধৰি বিক্ষোভ কাৰ্যসূচী চলোৱাৰ অন্তত জিলা উপায়ুক্তৰ প্ৰতিনিধি বিক্ষোভস্থলীত উপস্থিত হয় ৷ প্ৰতিনিধি গৰাকীক অংগনবাডী কৰ্মী সহায়িকাৰ সম্পাদিকা ডলিমইনা চৌধুৰী আৰু মধ্যাহ্ন ভোজন কৰ্মচাৰীৰ দয়ানা পাটোৱাৰী স্বাক্ষৰিত তিনিদফীয়া দাবী সম্বলিত স্মাৰক পত্ৰ প্ৰধান মন্ত্ৰীলৈ প্ৰেৰণ কৰে ৷
