ধুবুৰী-কোকৰাঝাৰ সীমান্তৰ বাশবাৰীত বনৰীয়া হাতীৰ আক্ৰমণত এজন ছাত্ৰৰ মৃত্যু
ৰাজ্যৰ বিভিন্ন প্ৰান্তত হাতী-মানুহৰ সংঘাত অব্যাহত থকাৰ সমান্তৰালকৈ ধুবুৰী-কোকৰাঝাৰ সীমান্তৰ বাশবাৰীত মঙলবাৰে নিশা বনৰীয়া হাতীৰ আক্ৰমণত এজন ছাত্ৰৰ মৃত্যু হোৱা ঘটনাই অঞ্চলটোত শোকৰ ছাঁ পেলাইছে।
বনৰীয়া হাতীৰ আক্ৰমণত প্ৰাণ যোৱা ছাত্ৰজন বন্ধুৰাম ব্ৰহ্ম বুলি জানিব পৰা গৈছে।
উল্লেখ্য যে বিগত প্ৰায় ১৫ দিন ধৰি অঞ্চলটোত সন্ত্ৰাসৰ সৃষ্টি কৰি আহিছিল বনৰীয়া হাতীয়ে। হাতীৰ জাকে অঞ্চলটোৰ খেতি পথাৰৰ লগতে মানুহৰ ঘৰ-দুৱাৰত বিভিন্ন ধৰণে উপদ্ৰৱ চলাই আহিছিল।
স্থানীয় লোকে বনৰীয়া হাতীৰ পৰা পৰিত্ৰাণ বিচাৰি বন বিভাগৰ লগত বহুবাৰ যোগাযোগ স্থাপন কৰিছে যদিও এই সন্দৰ্ভত বন বিভাগে কোনো ধৰণৰ বিহিত ব্যৱস্থা গ্ৰহণ নকৰাৰ অভিযোগ উত্থাপন হয়। লগতে স্থানীয় লোকে মৃত ছাত্ৰজনৰ পৰিয়াললৈ ক্ষতিপূৰণ আদায় দিয়াৰ বাবেও চৰকাৰক দাবী জনায়।
উল্লেখযোগ্য যে খাদ্যৰ সন্ধানত জাক-জাক বনৰীয়া হাতীয়ে বনাঞ্চলৰ পৰা লোকালয়লৈ নামি আহি বিভিন্ন খাদ্য শস্যৰ খেতি পথাৰ সমূহ তহিলং কৰাৰ লগতে বসতি স্থানৰো ক্ষয় ক্ষতি কৰে যাৰ ফলত মানুহৰ সৈতে সংঘাতৰ সৃষ্টি হয়। ইয়াৰ ফলতে মানুহ আৰু বনৰীয়া হাতীয়ে অস্বাভাবিক মৃত্যুক আঁকোৱালি ল’ব লগীয়া হয়।