অসমত বসবাস কৰা আদিবাসী লোক সকলক জনজাতিকৰণৰ মৰ্যাদা প্ৰদান নকৰাৰ প্ৰতিবাদত শুকুৰবাৰে সদৌ অসম আদিবাসী ছাত্ৰ সন্থা(আছা)ৰ নগাঁও জিলা সমিতিয়ে চামগুৰি থানাৰ অন্তৰ্গত ৰঙাগঢ়া তিনিআলিৰ ৩৭ নং ৰাষ্ট্ৰীয় ঘাইপথৰ ওপৰত কেন্দ্ৰীয় মন্ত্ৰী জুৱেল ওৰামৰ প্ৰতিমূৰ্তি দাহ কৰি এক উত্তাল প্ৰতিবাদ সাব্যস্ত কৰে৷
দিনৰ ১১ বজাৰ পৰা আৰম্ভ হোৱা প্ৰতিবাদী কাৰ্যসূচীত ছাত্ৰ সংগঠনটোৰ সভাপতি পুৰন গুঞ্জু, সম্পাদক ডমিনিক টপ্প, বিষয়ববীয়া ক্ৰমে চুৰেন মুণ্ডা, জেমছ ভেংৰা, প্ৰকাশ কুজুৰ, থানেশ্বৰ গড়সহ আছাৰ প্ৰায় শতাধিক ছাত্ৰ-কৰ্মী উপস্থিত হৈ আছা জিন্দাবাদ, জুৱেল ওৰাম মুৰ্দাবাদ, ভাৰত চৰকাৰ মুৰ্দাবাদ, বিজেপি চৰকাৰ মুৰ্দাবাদ আদি বিভিন্ন শ্লোগান দি পৰিৱেশ উত্তাল কৰি তোলে।
উল্লেখ্য যে, কেন্দ্ৰীয় চৰকাৰৰ জনজাতি পৰিক্ৰমা দপ্তৰৰ মন্ত্ৰীগৰাকীয়ে যোৱা ১৪ জুনত আদিবাসী জনগোষ্ঠীৰ জনজাতিকৰণৰ ক্ষেত্ৰত প্ৰদান কৰা টুলুঙা মন্তব্য প্ৰদান কৰিছিল। ইয়াৰ পৰিপ্ৰেক্ষিতত মন্ত্ৰীগৰাকীক তীব্ৰ ভাষাৰে গৰিহনা দিয়াৰ লগতে মন্ত্ৰীগৰাকীৰ প্ৰতিকৃতি ৩৭ নং ৰাষ্ট্ৰীয় ঘাইপথত জ্বলাই দি বিক্ষুব্ধ প্ৰতিবাদকাৰীসকলে কয় যে, আদিবাসী লোক সকলক অতিশীঘ্ৰে জনজাতিকৰণৰ মৰ্যাদা প্ৰদান নকৰিলে আছাই অসমত জংগী আন্দোলন কৰিবলৈ বাধ্য হ’ব।
উক্ত প্ৰতিবাদী কাৰ্যসূচীৰ সময়ত ৩৭ নং ৰাষ্ট্ৰীয় ঘাইপথত তীব্ৰ যান-জঁটৰ সৃষ্টি হোৱা পৰিলক্ষিত হয় ৷
