এন আৰ চিত আনৰ লিগেচী ডাটা ব্যৱহাৰ কৰি ভাৰতীয় নাগৰিকত্ব প্ৰমাণ কৰিবলৈ যোৱা এগৰাকী মহিলাক দেওবাৰে নগাঁৱত গ্ৰেপ্তাৰ কৰা হয়। জালিয়াতিৰে আনৰ লিগেচী জমা দি নিজকে সংশ্লিষ্ট ব্যক্তিগৰাকীৰ আত্মীয় বুলি দাবী কৰা ছাহেৰা বেগম নামৰ মহিলাগৰাকীক নগাঁও আৰক্ষীয়ে গ্ৰেপ্তাৰ কৰে।
জানিব পৰা মতে জিলাখনৰ দক্ষিণ গমাৰিআটি গাঁৱৰ বাসিন্দা উক্ত মহিলাগৰাকীক দেওবাৰে পুৱতি নিশা আৰক্ষীয়ে এক অভিযান চলাই নগাঁও চহৰৰ আমিনপট্টিৰ পৰা গ্ৰেপ্তাৰ কৰে।
নগাঁও জিলাৰ দক্ষিণ গমাৰিআটি গাঁৱৰ ছফিকুৰ ৰহমান নামৰ লোক এজনৰ পিতৃ হবিবুৰ ৰহমানৰ লিগেচী এন আৰ চিৰ নাম ভৰ্তি প্ৰক্ৰিয়াত জালিয়াতিৰে জমা দিছিল একেখন গাঁৱৰে হাজেৰা খাতুন আৰু ছাহেৰা বেগম নামৰ মহিলা দুগৰাকীয়ে। এন আৰ চিৰ বংশবৃক্ষ পৰীক্ষণৰ সময়ত এই জালিয়াতি পোহৰলৈ আহে।
আনহাতে, মহিলা দুগৰাকীয়ে একাংশ আত্মীয় তথা গুণ্ডা প্ৰকৃতিৰ লোকক লগত লৈ ছফিকুৰক ভাবুকি প্ৰদান কৰি শুনানিৰ সময়ত এন আৰ চি সেৱা কেন্দ্ৰত উপস্থিত হৈ তেওঁলোকক আত্মীয় বুলি চিনাক্ত কৰিবলৈ সকীয়াই দি আহিছিল।
এই সন্দৰ্ভত ছফিকুৰে এন আৰ চি সেৱা কেন্দ্ৰৰ কৰ্তৃত্বশীল বিষয়াক বিষয়টো অৱগত কৰে। এন আৰ চিৰ দায়িত্ববাহী বিষয়াৰ পৰামৰ্শক্ৰমে ছফিকুৰে মহিলা দুগৰাকীৰ বিৰুদ্ধে নগাঁও সদৰ আৰক্ষী থানাত এক গোচৰ ৰুজু কৰে।
নগাঁও আৰক্ষীয়ে ১৯৪৪/২০১৮ নম্বৰত গোচৰটো পঞ্জীভুক্ত কৰি দেওবাৰে ছাহেৰা বেগমক গ্ৰেপ্তাৰ কৰে। দেওবাৰে ধৃত মহিলাগৰাকীক জেৰাৰ অন্তত আদালতত হাজিৰ কৰাই কাৰাগাৰালৈ প্ৰেৰণ কৰা হয়।
আনহাতে, আৰক্ষী সূত্ৰই জনোৱা মতে হাজেৰা খাতুন নামৰ মহিলাগৰাকী পলাতক অৱস্থাত আছে।
উল্লেখযোগ্য যে লিগেচী জালিয়াতিৰ সন্দৰ্ভত হোজাই আৰক্ষী থানাত পঞ্জীভুক্ত ২৩৪/২০১৮ নম্বৰৰ আন এক গোচৰত শনিবাৰে হোজাই আৰক্ষীয়ে কামৰূপৰ মিৰ্জাৰ পৰা সুভাষ দাস, ৰাজু দাস আৰু হেমন্ত নাথ নামৰ তিনিজন লোকক গ্ৰেপ্তাৰ কৰিছিল।
