নাগৰিকত্ব সংশোধনী বিধেয়ক -২০১৬ বাতিলৰ দাবীত দেওবাৰে নগাঁও জিলাৰ নিকটবৰ্তী অঞ্চল ৰাইদংগীয়াত কেইবা সহস্ৰাধিক ৰাইজে ৰাজপথ কঁপাই তোলে।
প্ৰতিবাদকাৰী ৰাইজে পৰম্পৰাগত জাতীয় সাজ পৰিধান কৰি হাতে হাতে প্লে কাৰ্ডলৈ নাগৰিকত্ব সংশোধনী বিধেয়কখন কোনো কাৰণতেই মানি লোৱা নহ’ব বুলি সকীয়াই দিয়াৰ লগতে জাতিৰ স্বার্থত প্ৰতিজন খিলঞ্জীয়াক গাত শেষ বিন্দু তেজ থকালৈকে এই নাগৰিকত্ব সংশোধনী বিধেয়কৰ বিৰোধিতা কৰি যাবলৈ আহ্বান জনায়।
হিন্দু বাংলাদেশীক সংস্থাপনৰ মনোবৃত্তিৰে কেন্দ্ৰীয় চৰকাৰে যদি বিধেয়কখন আইনত পৰিণত কৰে তেন্তে উলংগ হৈ প্ৰতিবাদ কৰাৰ লগতে প্ৰয়োজন সাপেক্ষে আত্মজাহ দিয়াৰো হুংকাৰ প্ৰদান কৰে প্ৰতিবাদকাৰীসকলে।
ঘৰৰ পদুলিয়ে পদুলিয়ে অসমীয়াৰ স্বাভিমানৰ প্ৰতীক গামোচা একোখন কৈ উত্তোলন কৰি প্ৰতীকী অৰ্থত মানৱ শৃংখল ৰূপায়ণ কৰাৰ লগতে ৰাইদঙীয়াৰ বিভিন্ন দল সংগঠনৰ লগতে স্থানীয় ৰাইজে প্ৰতিবাদ সাব্যস্ত কৰে।
সমগ্ৰ ৰাজ্যতে নাগৰিকত্ব সংশোধনী বিধেয়ক ২০১৬ বাতিলৰ দাবীত অসমৰ জাতীয় দল-সংগঠনৰ লগতে সাধাৰণ ৰাইজে প্ৰতিবাদ মুখৰ হৈ পৰাৰ সমান্তৰালকৈ নগাঁও জিলাতো প্ৰতিবাদৰ জোৱাৰ উঠিছে।
অবৈধ বাংলাদেশী সংস্থাপনৰ উদ্দেশ্য লৈ কেন্দ্ৰীয় চৰকাৰে আনিব খোজা বিতৰ্কিত বিধেয়কখন কোনো কাৰণতে মানি নলয় বুলি আন্দোলনকাৰীসকলে ঘোষণা কৰে।
