আলিগড় মুছলিম বিশ্ববিদ্যালয়ে (এ এম ইউ) কৰ্কট ৰোগৰ চিকিৎসাত বৈপ্লৱিক পৰিৱৰ্তন আনিব পৰা এটা নতুন কেন্সাৰ প্ৰতিৰোধী ঔষধৰ পেটেণ্ট লাভ কৰিছে। এই ঔষধ প্ৰস্তুত কৰিছে বিশ্ববিদ্যালয়ৰ ৰসায়ন বিভাগৰ অধ্যাপক ফাৰুক আৰ্জমাণ্ড, ডাঃ জিনাত আফছান আৰু অধ্যাপক ছৰটাজ টাবাচ্ছুমে। এই ঔষধৰ বিশেষত্ব হ’ল ইয়াৰ ব্যয় কম হোৱাৰ লগতে মানৱ শৰীৰত পাৰ্শ্বক্ৰিয়া নূন্যতম।
উল্লেখ্য যে অধ্যাপক ফাৰুক আৰ্জমাণ্ড এগৰাকী প্ৰখ্যাত বিজ্ঞানী, যাৰ ১৯৬টা গৱেষণামূলক প্ৰকাশন আৰু ৭,০০০ৰো অধিক উদ্ধৃতিৰ সৈতে ৪২টা এইচ-সূচকাংক (H-index) লাভ কৰিছে। তেওঁ চি আৰ এছ আই ব্ৰঞ্জ পদক, আই এছ চি বি মহিলা বিজ্ঞানী বঁটা আৰু এ এম ইউৰ শ্ৰেষ্ঠ গৱেষক বঁটাৰ দৰে কেইবাটাও ৰাষ্ট্ৰীয় আৰু আন্তঃৰাষ্ট্ৰীয় সন্মান লাভ কৰিছে।
এই পেটেণ্টৰ সহ-আৱিষ্কাৰক ডাঃ জিনাত আফছান আৰু অধ্যাপক ছৰটাজ টাবাচ্ছুম সমন্বয় ৰসায়ন বিজ্ঞান আৰু ঔষধ বিকাশৰ ক্ষেত্ৰত বিশেষজ্ঞ। তেওঁলোকৰ দক্ষতাই এই ঔষধৰ গঠন আৰু কাৰ্য ক্ষমতা অধিক উন্নত কৰি তুলিছে।
ইফালে, এ এম ইউৰ বৈদ্যুতিক অভিযান্ত্ৰিক বিভাগৰ অধ্যাপক মহম্মদ ৰেহানক ২০২৫ চনৰ আইইইই পাৱাৰ এণ্ড এনাৰ্জি ছ’চাইটি হিংগোৰানী বঁটাৰ বাবে নিৰ্বাচিত কৰা হৈছে। সৌৰ ফটোভল্টিক ব্যৱস্থাৰ উন্নয়ন আৰু প্ৰয়োগৰ ক্ষেত্ৰত তেওঁৰ ব্যতিক্ৰমী অৱদানৰ বাবে এই সন্মান প্ৰদান কৰা হৈছে বুলি জানিব পৰা গৈছে।
বৰ্তমান অধ্যাপক ৰেহান ৰাষ্ট্ৰীয় সৌৰ শক্তি প্ৰতিষ্ঠানৰ সঞ্চালক প্ৰধান আৰু ব্যুৰো অৱ ইণ্ডিয়ান ষ্টেণ্ডাৰ্ডছৰ সৌৰ পি ভি কমিটিৰ অধ্যক্ষ হিচাপে কাৰ্যনিৰ্বাহ কৰি আছে। তেওঁৰ নেতৃত্বত এ এম ইউত বৃহৎ পৰিসৰৰ সৌৰশক্তি স্থাপন অভিযান চলি আছে, যাৰ ফলত বিশ্ববিদ্যালয়ৰ চৌহদ এটা সেউজ শক্তি আৰু বহনক্ষমতাৰ আৰ্হি কেন্দ্ৰ হৈ পৰিছে।
এই কামে প্ৰমাণ কৰে যে শিক্ষানুষ্ঠানসমূহে পৰিৱেশ সচেতনতা আৰু বহনক্ষম উন্নয়নৰ ক্ষেত্ৰত গুৰুত্বপূৰ্ণ ভূমিকা পালন কৰিব পাৰে। অধ্যাপক ৰেহানক এই বঁটা ২০২৫ চনৰ ৭ৰ পৰা ৯ ডিচেম্বৰলৈ আই আই টি হায়দৰাবাদত অনুষ্ঠিত হ’বলগীয়া আইইইই ইণ্টাৰনেশ্যনেল কনফাৰেন্স অন পাৱাৰ চিষ্টেমছত প্ৰদান কৰা হ’ব।
