আজি পুৱাই এটা চাঞ্চল্যকৰ খবৰ সমগ্ৰ নগাওঁ চহৰখনতে বনজুইৰ দৰে বিয়পি পৰে। জানিব পৰামতে, নগাঁও সদৰ আৰক্ষী থানাৰ অন্তৰ্গত মধুপৰ আমতল(চেগুনবাৰী)ৰ কলং নৈত আজি পুৱাই মাছ মাৰিবলৈ যোৱা এজন লোকৰ জালত মাছৰ পৰিৱৰ্তে উঠে এটা মৃতদেহ । এনে ঘটনাত হতভম্ব হৈ পৰা মাছমৰীয়াজনে লগে লগে নগাওঁ আৰক্ষীক খবৰ দিয়াত আৰক্ষীৰ এটা দল আহি মৃতদেহটো উদ্ধাৰ কৰি মৰণোত্তৰ পৰীক্ষাৰ ব্যৱস্থা কৰে।
আৰক্ষীৰ সূত্ৰই জনোৱামতে, উদ্ধাৰ হোৱা মৃতদেহটো সঞ্জীৱ দে'(৩৪)ৰ বুলি ইতিমধ্যে চিনাক্ত কৰা হৈছে। তেওঁৰ ঘৰ স্থানীয় নাজিৰাজান অঞ্চলত। নগাঁও চহৰৰ দোকানে দোকানে বিভিন্ন চকলেট জাতীয় সামগ্ৰী বিক্ৰী কৰি জীৱিকা নিৰ্বাহ কৰিছিল এই দুৰ্ভগীয়া ক্ষুদ্ৰ ব্যৱসায়ীজনে।
ঘটনাটো আত্মহত্যাৰ নে হত্যাৰ সেইটো এতিয়াও আৰক্ষীয়ে নিশ্চিত কৰিব পৰা নাই।
পৰিয়ালৰ মানুহে জনোৱামতে, সঞ্জীৱে আন দিনাৰ দৰে যোৱা ২০ মে’ৰ পুৱাই নিজৰ কৰ্মস্থলী হয়ৰবগাঁৱস্থিত চকলেট গুদামলৈ যায়। দিনটোৰ কাম শেষ কৰি সন্ধ্যা তেওঁ ঘৰলৈ উভতিও আহিছিল। কিন্তু তাৰ পিছত পুনৰ নিশা প্ৰায় আঠ বজাত নিজৰ মটৰ চাইকেলেৰে তেওঁ ঘৰৰ পৰা ওলাই যায় আৰু তেতিয়াৰ পৰাই সন্ধানহীন হৈ আছিল।
অৱশেষত আজি পুৱা কলঙত তেওঁৰ মৃতদেহ উদ্ধাৰ হয়। একাংশ স্থানীয় ৰাইজে তেওঁক কোনোবাই হত্যা কৰি কলঙত পেলাই দিয়াৰ সন্দেহ প্ৰকাশ কৰিছে। ইতিমধ্যে ঘটনা সন্দৰ্ভত আৰক্ষীয়ে তদন্ত অব্যাহত ৰখাৰ লগতে মৃত যুৱকজনৰ মটৰ চাইকেল আৰু ম’বাইলটো চকলেট গুদামঘৰৰ পৰা উদ্ধাৰ কৰিবলৈ সক্ষম হৈছে।
