‘যদিহে এনএচচিএন-আইএম আৰু কেন্দ্ৰৰ মাজত স্বাক্ষৰিত হোৱা নগা চুক্তিৰ ফলত মণিপুৰৰ ভৌগলিক অখণ্ডতাৰ ক্ষেত্ৰত কোনোধৰণৰ আপোচ কৰা হয় তেন্তে মই আৰু মোৰ লগতে বহুতো বিধায়কে পদত্যাগ কৰিবলৈ বাধ্য হ’ম’। এই কথা কয় মণিপুৰৰ মুখ্য মন্ত্ৰী এন বীৰেন সিঙে।
সোমবাৰে মণিপুৰৰ মুখ্য মন্ত্ৰী সিঙ আৰু বিধায়কৰ এটা প্ৰতিনিধি দলে নতুন দিল্লীত কেন্দ্ৰীয় গৃহ মন্ত্ৰী ৰাজনাথ সিঙক সাক্ষাৎ কৰি নগা চুক্তিৰ উপৰি বহুকেইটা গুৰুত্বপূৰ্ণ বিষয়ত আলোচনা কৰে।
মণিপুৰ বিধানসভাক নগা শান্তি চুক্তিৰ ক্ষেত্ৰত কেন্দ্ৰীয় চৰকাৰে গ্ৰহণ কৰা স্থিতি স্পষ্ট কৰিবলৈ অনুৰোধ জনাই মুখ্য মন্ত্ৰীগৰাকীয়ে কয়, “মণিপুৰৰ ইতিহাস, ইয়াৰ জনগাঁথনি আৰু ঐতিহাসিক পৃষ্ঠভূমিলৈ চাই ইয়াৰ সুৰক্ষা তথা অখণ্ডতা ৰক্ষা কৰাটো অতিকে গুৰুত্বপূৰ্ণ হৈ পৰিছে । আমি নগা শান্তি চুক্তিৰ এক শান্তিপূৰ্ণ সমাধান বিচাৰো, নগা শান্তি চুক্তিৰ ফলত যদিহে মণিপুৰত বিয়োগাত্মক প্ৰভাৱ পৰে তেন্তে ৰাজ্যৰ জনসাধাৰণক নিয়ন্ত্ৰণ কৰাটো কঠিন হৈ পৰিব। যদিহে আমাৰ কথা গুৰুত্বসহকাৰে লোৱা নহয় তেন্তে আমি ৰাজহুৱাভাৱে পদত্যাগ কৰিবলৈ বাধ্য হম’।
উল্লেখ্য যে, মণিপুৰত বিজেপিৰ নেতৃত্বত ৰাজ্য চৰকাৰ পৰিচালিত হৈ আছে যদিও মুখ্য মন্ত্ৰী বীৰেন সিঙ নেতৃ্ত্বাধীন চৰকাৰখনে কিন্তু কেন্দ্ৰীয় চৰকাৰৰ বহুকেইটা সিদ্ধান্তৰ মুকলিকৈ বিৰোধিতা কৰি ৰাজনৈতিক ক্ষেত্ৰত নিজৰ শক্তিশালী স্থিতি প্ৰদৰ্শন কৰিছে ।
নাগৰিকত্ব সংশোধনী বিধেয়কৰ বিৰোধিতা আৰু কেন্দ্ৰীয় চৰকাৰৰ প্ৰত্যক্ষ হস্তক্ষেপত চলি থকা নগা শান্তি চুক্তিৰ বিৰুদ্ধে এনেদৰে মুকলি বিদ্ৰোহে কেন্দ্ৰৰ বিজেপি নেতৃ্ত্বক শলঠেকত পেলোৱা পৰিলক্ষিত হৈছে।
মণিপুৰৰ মুখ্য মন্ত্ৰী এন বীৰেন সিঙৰ স্পষ্ট স্থিতিয়ে পৰৱৰ্তী পৰ্যায়ত কেন্দ্ৰীয় চৰকাৰে সমগ্ৰ বিষয়টো সন্দৰ্ভত কি পদক্ষেপ গ্ৰহণ কৰে সেইয়া লক্ষণীয় হ’ব ।
