প্ৰধানমন্ত্ৰী নৰেন্দ্ৰ মোদী অসম, মণিপুৰ আৰু মিজোৰাম ভ্ৰমণ সামৰি কালি উভতি গৈছে। প্ৰধানমন্ত্ৰীৰ ভ্ৰমণৰ বিষয়ে আমি কি ক’ম? ভূপেন হাজৰিকাৰ জন্ম শতবৰ্ষ উদযাপনৰ কাৰ্যসূচী দেশৰ প্ৰধানমন্ত্ৰী গৰাকীয়ে উদ্বোধন কৰাটো এটা ভাল কথা। ইতিবাচক কথা। ভূপেন হাজৰিকা অসম আৰু উত্তৰ-পূৱ ভাৰতৰ এক সমন্বয়ৰ প্ৰতীক আছিল। গতিকে ভূপেন হাজৰিকাৰ জন্ম শতবাৰ্ষিকীৰ উদ্বোধনী অনুষ্ঠানৰ ভাষণত নৰেন্দ্ৰ মোদী ডাঙৰীয়াই দলীয় সংকীৰ্ণতাৰ উৰ্দ্ধলৈ গৈ ভাষণ প্ৰদান কৰিব পাৰিব লাগিছিল যিটো আমি দেখা নাপালোঁ। এইটো পৰিতাপৰ কথা।
অসম চৰকাৰে শতবৰ্ষ উদযাপনৰ অনুষ্ঠানত ভূপেন হাজৰিকাৰ পৰিয়ালক জড়িত কৰাটো প্ৰশংসনীয়। কিন্তু তাৰ বাহিৰে চৰকাৰী পক্ষৰ বা শিবিৰৰ বাহিৰত থকা লোক সকলক শতবৰ্ষ অনুষ্ঠানত জড়িত কৰাটো কিন্তু আমি নেদেখিলোঁ। আন এটা কথা আমি লক্ষ্য কৰিছোঁ, অসম চৰকাৰে যেন ভূপেন হাজৰিকাৰ শতবৰ্ষ উদযাপনৰ কাৰ্যসূচীটো তেওঁলোকৰ নিজৰ দলীয় প্ৰচাৰতহে ব্যৱহাৰ কৰিছে, বিশেষকৈ আগন্তুক নিৰ্বাচনৰ কথা ভাবি। অন্ততঃ আমাৰ তেনে অনুভৱ হৈছে। আনহাতে মংগলদৈত প্ৰধানমন্ত্ৰী মোদীয়ে কোৱা এই কথাখিনি আপোনালোকে শুনকচোন। এই কথাবোৰ বৰ উপৰুৱা আৰু পক্ষপাতিত্বমূলক নহয়নে? গৰুসুঁতি প্ৰকল্পত কি হৈছে? চৰকাৰে তাত কিমান ভৰ্তুকী দিছে? মানে চাবচিডি দিছে ? তাৰদ্বাৰা কিমান স্থানীয় কৃষক উপকৃত হৈছে? গৰুসুঁতিৰ গীৰগাই প্ৰকল্পত কি হৈছিল কোনে নাজানে?
গীৰ গাইক লৈ হোৱা দুৰ্নীতিৰ বিষয়টো কেনেকৈ স্বাৰ্থ জড়িত মহলে এতিয়া গাপ দি থলে সেইবোৰ কথা আমি নাজানোনে? গৰুসুঁতি প্ৰকল্পৰ কাৰণে কাক তাৰ পৰা উচ্ছেদ কৰা হৈছিল? উচ্ছেদিত লোকৰ মৃতদেহৰ ওপৰত কোনো নৃত্য কৰিছিল? সেইবোৰ কথা অসমৰ মানুহে এতিয়াও পাহৰি যোৱা নাই। প্ৰধানমন্ত্ৰীয়ে গৰুসুঁতি প্ৰকল্প কৃষকক সংস্থাপন দিয়া লাভজনক প্ৰকল্প বুলি কোৱাৰ বিপৰীতে, আজি কেইমাহমান আগতে মুখ্যমন্ত্ৰী হিমন্ত বিশ্ব শৰ্মাই লাভ-লোকচানতকৈ গৰুসুঁতি প্ৰকল্পক অসমীয় জাতীয় গৌৰৱ আৰু পৰিচয়ৰ লগতহে জড়িত কৰিব লাগে বুলি কোৱা নাছিল জানো? তাৰপিছত মোদীয়ে অসমত কেইবা হাজাৰ কোটি টকীয়া আন্তঃগাঠনি প্ৰকল্পৰ আধাৰশীলা স্থাপন কৰে। আমাক আন্তঃগাঠনি নালাগিব তেনে কথা নহয়। কিন্তু এই আন্তঃগাঠনি প্ৰকল্পবোৰৰ দ্বাৰা প্ৰকৃততে কোন উপকৃত হ’ব? অসমৰ সাধাৰণ ৰাইজ নে বণিক শ্ৰেণী, কৰ্পোৰেট গোষ্ঠী? আৰু ই আমাৰ পৰিৱেশ আৰু স্থানীয় সম্পদৰ কি ক্ষতি কৰিব সেইবোৰ কোনে চাব? কোনে তাৰ হিচাপ ল’ব? গুৱাহাটীত ব্ৰহ্মপুত্ৰৰ ওপৰত আমাক আৰু কিমান দলঙৰ প্ৰয়োজন? এখনৰ পিছত এখনকৈ দলং নিৰ্মাণ কৰি নদীটোকে আমি শেষ কৰি দিম নেকি? কাৰ স্বাৰ্থত এই দলংবোৰ? কোনে তাৰ জবাব দিব?তাৰপিছত আহিল মণিপুৰৰ কথা। মণিপুৰৰ কথা কি কোৱা যায়? মণিপুৰে কাৰ কাৰণে আজি এই অৱস্থা পালে? বীৰেন সিঙৰ বিজেপিৰ চৰকাৰকে মণিপুৰৰ বৰ্তমান অৱস্থাৰ বাবে মানুহে জগৰীয়া নকৰেনে? দুহেজাৰ তেইশ চনৰ পৰা এতিয়ালৈ মণিপুৰ জ্বলি শেষ যোৱাৰ উপক্ৰম! অথচ মোদীয়ে এতিয়াহে মণিপুৰলৈ আহিবলৈ সময় পালে? কিন্তু যি ধৰণে মোদীৰ ভ্ৰমণৰ প্ৰচাৰ চলোৱা হৈছে সেই ধৰণে মোদীৰ ভ্ৰমণে সঁচাকৈয়ে মণিপুৰলৈ শান্তি ঘূৰাই আনিবনে? বিজেপিৰে কুকি এম এল এ এজনে দেখোন মোদীৰ ভ্ৰমণ অৰ্থহীন চৰকাৰী খৰচ বুলিহে কৈছে। আৰু ১৩ চেপ্তেম্বৰৰ দিনা চেন্নাইৰ পৰা প্ৰকাশিত ‘The Federal’ ত ধীৰেন এ চানডোকামৰ প্ৰবন্ধ ‘Modi’s projects offer little solace to the thousands in Manipur relief camps’ত তেওঁ স্পষ্টভাবে লিখিছে মোদীৰ ভ্ৰমণ কিমান উপৰুৱা আছিল।
ভ্ৰমণ কালত সংঘৰ্ষজৰ্জৰ ৰাইজৰ অন্তৰৰ বেদনা বুজিবলৈ মোদীয়ে যেন কোনো আন্তৰিক প্ৰয়াস কৰা নাছিল। সভাবোৰলৈ অহা মানুহবোৰ আছিল মূলতঃ চৰকাৰী কৰ্মচাৰী। তেওঁলোকক মোদীৰ সভাত উপস্থিত থাকিবলৈ বাধ্য কৰোৱা হৈছিল। মোদীয়ে মণিপুৰতো ৮,৫০০ কোটি টকাৰ অন্তঃ গাঠনি প্ৰকল্প উদ্বোধন কৰাৰ ওপৰতহে গুৰুত্ব দিছিল। মণিপুৰৰ নাগৰিক সমাজ আৰু স্বতন্ত্ৰ সাংবাদিক সকলে মন্তব্য কৰিছে যে প্ৰকৃত সমস্যা সমাধানৰ বাবে আন্তৰিক প্ৰচেষ্টা চলোৱাৰ সলনি মণিপুৰলৈ স্বাভাৱিক অৱস্থা ঘূৰি আহিছে বুলি প্ৰতিপন্ন কৰাটোৱে যেন মোদীৰ ভ্ৰমণৰ মূল উদ্দেশ্য আছিল। দুটা সম্প্ৰদায়ৰ মাজৰ এনে গভীৰ সংকট, বিভাজন আৰু অবিশ্বাস কেৱল কোটি টকীয়া আন্তঃগাঠনি প্ৰকল্পই সমাধান কৰিব পাৰিবনে?
কোনো কোনো ঠাইততো মোদী মণিপুৰত থকা সময়তে পৰিস্থিতি অশান্তহৈ পৰিছিল। এইবাৰ আহিল মিজোৰাম। মিজোৰামত মোদীয়ে এটা নতুন ৰেল পথ উন্মোচন কৰিছিল আৰু অন্যান্য আন্তঃগাঠনি প্ৰকল্পও উদ্বোধন কৰিছিল। কিন্তু কোনো কোনোৱে মোদীৰ মিজোৰাম ভ্ৰমণক দুৰ্লভ খনিজ সম্পদৰ লগতো যুক্ত কৰিব বিচাৰে। সেই বিষয়ে অৱেশ্যে এতিয়াই একো খাটাংকৈ ক’ব নোৱাৰি।
