ৰাজ্যৰ বিভিন্ন প্ৰান্তত নাৰী নিৰ্য্যাতনৰ ঘটনা সংঘটিত হোৱাৰ সমান্তৰালকৈ নলবাৰীতো কালি যৌতুকৰ বাবে নাৰী নিৰ্য্যাতনৰ বলি হ’ল এগৰাকী মহিলা। নলবাৰীৰ বাকৰিকুছিত স্বামীয়ে পত্নীক হত্যা কৰাৰ অভিযোগ উত্থাপন হোৱাত অঞ্চলটোত এক চাঞ্চল্যকৰ পৰিবেশে বিৰাজ কৰিছে। এক তথ্য অনুসৰি নলবাৰীৰ বাকৰিকুছিত গাৱঁৰ চিৰাজ আলীৰ কন্যা তাছমিনা বেগম(২০)দুই বছৰ পূৰ্বে একেখন গাঁৱৰে ইব্ৰাহীম আলীৰ পুত্ৰ জয়লাৰ আলীৰ সৈতে বিবাহপাশত আবদ্ধ হৈছিল । জানিব পৰা মতে বিয়াৰ পূৰ্বে জয়নাল আৰু তাছমিনাৰ মাজত প্ৰেমৰ সম্পৰ্ক আছিল আৰু এদিন তছলিমা বিদ্যালয়ৰ পৰা ঘৰলৈ উভটি অহাৰ পথতে পলুৱাই লৈ গৈছিল। তাৰ পিছৰ পৰাই তাছমিনাই জয়নাল আলীৰ পত্নী হিচাপে দিন অতিবাহিত কৰিছিল। এনেদৰে কিছু দিন পাৰ হোৱাৰ পিছতে জয়নাল আৰু তেওঁৰ পৰিয়ালৰ লোকে যৌতুক বিচাৰি তাছমিনাক শাৰিৰীক আৰু মানসিক ভাৱে অত্যাচাৰ কৰা আৰম্ভ কৰিছিল।
স্থানীয় ৰাইজ তথা সংখ্যালঘু সংগঠন আমছুই জয়নাল আলীৰ ঘৰত গৈ সমস্যাটো সমাধানৰ বাবে চেষ্টা চলাইছিল আৰু জয়নাল আৰু তেখেতৰ পিতৃক সকিয়নী প্ৰদান কৰিছিল। আনহাতে তাছমিনাৰ পিতৃয়ে কৰা অভিযোগ অনুসৰি জয়নালে তছমিনাৰ পিতৃৰ পৰা একলাখ টকা দাবী কৰিছিল। তছনিমাৰ পৰিয়ালৰ লোকে এটা বন্ধকোঠাৰ ভিতৰত তাছমিনাক হাত-ভৰি বান্ধি ডিঙি চেপি হত্যা কৰা বুলি জয়নাল আলী আৰু পিতৃ ইব্ৰাহীম আলীৰ বিৰুদ্ধে অভিযোগ উত্থাপন কৰে। তাছমিনা পিতৃয়ে স্থানীয় থানাত এজাহাৰ দাখিল কৰিছে আৰু উক্ত এজাহাৰ ভিত্তিত আৰক্ষীয়ে জয়নাল আৰু জয়নালৰ পিতৃ ইব্ৰাহীমক বুধবাৰে আটক কৰি সোধা-পোছা অব্যাহত ৰাখিছে। আনহাতে অভিযুক্ত জয়নালৰ পৰিয়ালে তাছমিনাই আত্মহত্যা কৰা বুলি কয়। আৰক্ষীয়ে তছলিমাৰ মৃতদেহটো মৰণোত্তৰ পৰীক্ষাৰ বাবে নলবাৰী অসামৰিক চিকিৎসালয়লৈ প্ৰেৰণ কৰে। আৰক্ষীয়ে তদন্ত প্ৰক্ৰিয়া চলাই আছে যদিও প্ৰকৃত দোষীক বৰ্তমান সময়লৈকে চিনাক্ত কৰিব পৰা নাই।
