৮৫৫ জন চহিদৰ চৰম ত্যাগৰ বিনিময়ত হোৱা অসমৰ জাতি-বৰ্ণ নিৰ্বিশেষে সকলো স্তৰৰ ৰাইজে আদৰি লোৱা ঐতিহাসিক অসম চুক্তিক নস্যাৎ কৰি বিজেপি নেতৃত্বাধীন কেন্দ্ৰীয় চৰকাৰে নাগৰিকত্ব (সংশোধনী) বিধেয়ক, ২০১৬ৰ জৰিয়তে অবৈধ বিদেশীক ধৰ্মৰ ভিত্তিত নাগৰিকত্ব প্ৰদান কৰিবলৈ উদ্যোগ লোৱা কাৰ্যৰ তীব্ৰ প্ৰতিবাদ জনাই আজি ২৬ মে’ৰ সন্ধ্যা অসম জাতীয়তাবাদী যুৱ ছাত্ৰ পৰিষদ ( AJYCP )ৰ গৌৰীসাগৰ আঞ্চলিক সমিতিয়ে বিতৰ্কিত বিধেয়কখনৰ বাতিলৰ দাবীত এক বৃহৎ জোঁৰ সমদল বাহিৰ কৰে।
গৌৰীসাগৰ পৰিবহণ নিগম বাছ আস্থানৰপৰা সংগঠনটোৰ কেইবা শতাধিক সদস্যৰ লগতে আছু, আটাছু আৰু স্থানীয় ৰাইজে হাতে হাতে জোঁৰ লৈ চৰকাৰবিৰোধী বিভিন্ন শ্লোগানেৰে গৌৰীসাগৰৰ আকাশ বতাহ কঁপাই তোলে।
এই প্ৰতিবাদী কাৰ্যসূচীত অসম জাতীয়তাবাদী যুৱ ছাত্ৰ পৰিষদৰ গৌৰীসাগৰ আঞ্চলিক সমিতিৰ সভাপতি সম্পাদকৰ উপৰিও জিলা সমিতিৰ সভাপতি দিব্যজ্যোতি দাস, উপ সভাপতি প্ৰাঞ্জল শৰ্মাৰ লগতে আছুৰ জিলা সমিটিৰ সাংগঠনিক সম্পাদক দেৱব্ৰত দাস, আছুৰ গৌৰীসাগৰ আঞ্চলিক সমিতিৰ বিষয়ববীয়া ইন্দ্ৰানুজ বৰা, আটাছুৰ জিলা সমিতিৰ উপ সভাপতি মৌচুম গগৈ আৰু আলোচনাপন্থী গোটৰ কেন্দ্ৰীয় নেতা মনোজ লাহন আদি উপস্থিত থাকি অবৈধ বাংলাদেশীৰ ইছ্যুক সাম্প্ৰদায়িক ৰং সানি কেন্দ্ৰীয় চৰকাৰৰ ওচৰত আঁঠু লৈ অসমৰ ৰাইজক সংকটৰ মাজলৈ ঠেলি দিয়া মুখ্য মন্ত্ৰী সৰ্বানন্দ সোণোৱালক তীব্ৰ ভাষাৰে সমালোচনা কৰাৰ লগতে ৰাজ্যখনৰ খিলঞ্জীয়া মানুহৰ অস্তিত্ব আৰু পৰিচয়ৰ প্ৰতি প্ৰত্যাহ্বান সৃষ্টি কৰিব খোজা বিতৰ্কিত বিধেয়কখনৰ বিৰুদ্ধে যুজঁ দি যাব বুলি মন্তব্য কৰে৷
