১ জুনত অনুষ্ঠিত চৰকাৰৰ কেবিনেট বৈঠকত অগপৰ মন্ত্ৰীকেইজনৰ ভূমিকা এতিয়া সমগ্ৰ ৰাজ্যত চৰ্চাৰ বিষয় হৈ পৰিছে। আনহাতে দলৰ ভিতৰতো এই কথাটোৱে অসন্তুষ্টিৰ সৃষ্টি কৰা বুলি খবৰ পোৱা গৈছে।
উল্লেখযোগ্য যে সমগ্ৰ অসমতে চলি থকা নাগৰিকত্ব সংশোধনী বিধেয়কৰ তীব্ৰ বিৰোধিতাৰ লগত তাল-মিল ৰাখি অগপয়ো বিধেয়কখনৰ বিৰোধিতা কৰি বিভিন্ন কাৰ্য্যসূচী লৈ আহিছিল। আনকি দলটোৱে বিধেয়কখন বাতিল নকৰিলে বিজেপিৰ সৈতে মিত্ৰতা ভংগ কৰাৰ ভাবুকি দি আহিছে। মাজে মাজে দলটোৱে এই বিষয়টোত এটা সৰ্বসন্মত সিদ্ধান্ত ল’বৰ বাবে চৰকাৰৰ কেবিনেট বৈঠকৰ দাবীও কৰি আহিছিল।
কিন্তু কালি অনুষ্ঠিত চৰকাৰৰ কেবিনেট বৈঠকত দলটোৰ মন্ত্ৰীকেইজনে সুবিধা পায়ো বিধেয়ক সন্দৰ্ভত একো এটাই নুলিয়ালে। অথচ আগদিনা দলৰ কাৰ্য্যালয়ত এই লৈ এখন বৈঠক অনুষ্ঠিত হৈছিল, য’ত চৰকাৰৰ কেবিনেট বৈঠকত বিধেয়কখনৰ বিৰোধিতাৰ সিদ্ধান্ত ল’বলৈ দাবী উত্থাপন কৰা হ’ব বুলি সিদ্ধান্ত লোৱা হৈছিল।
তাৰ পিছতো দলৰ মন্ত্ৰীকেইজনে বিষয়টো সন্দৰ্ভত কেবিনেট বৈঠকত একো এটা নোকোৱাটোৱে ৰহস্যৰ সৃষ্টি কৰিছে। স্বাভাৱিকতে দলৰ ভিতৰে-বাহিৰে প্ৰশ্ন হৈছে, মন্ত্ৰীকেইজনে এই ক্ষেত্ৰত দলক প্ৰতাৰণা কৰিলে নেকি? দলক আন্ধাৰত ৰাখি আৰু জাতিৰ স্বাৰ্থক পিছত ৰাখি মন্ত্ৰীকেইজনে নিজৰ ৰাজনৈতিক অংকত ব্যস্ত হ’ল নেকি? আজিৰ সংখ্যাৰ সীমিত সংখ্যক কাকতত দলটোৱে বিষয়টো উত্থাপন কৰিছিল বুলি বাতৰি ওলাইছে যদিও, সেয়া যে মিছা দলৰ সভাপতি আৰু কৃষি মন্ত্ৰী অতুল বৰা আৰু দলটোৰ এজন বিধায়ক ৰমেন্দ্ৰ নাৰায়ণ কলিতাৰ ভাষ্যতে ওলাই পৰিছে।
মন্ত্ৰী তথা দলটোৰ সভাপতি অতুল বৰাই সংবাদ মাধ্যমৰ আগত কয় যে মুখ্য মন্ত্ৰীয়ে বিষয়টো সমন্বয়ৰক্ষী সমিতিৰ বৈঠকত আলোচনা কৰাৰ আশ্বাস দিয়া বাবে তেওঁলোকে কেবিনেট বৈঠকত নুলিয়ালে। আনহাতে ৰমেন্দ্ৰ নাৰায়ণ কলিতাই কয় যে কেবিনেট বৈঠকতে বিষয়টো উত্থাপন হ’বই লাগিব বুলি কোনো কথা নাই।
