নাগৰিকত্ব সংশোধনী বিধেয়কৰ প্ৰতিবাদত বোকাখাতত অগপৰ গণ স্বাক্ষৰ সংগ্ৰহ অভিযান

সমগ্ৰ ৰাজ্যৰ লগতে  আজি বোকাখাততো অসম গণ পৰিষদ দলৰ বোকাখাত জিলা সমিতিৰ উদ্যোগত নাগৰিকত্ব সংশোধনী বিধেয়কৰ বিৰুদ্ধে গণ স্বাক্ষৰ অভিযান চলোৱা হয় ৷

এই উপলক্ষে বোকাখাতৰ নাট্য মন্দিৰ প্ৰাঙ্গণত আয়োজিত এক বিশেষ অনুষ্ঠানত জিলা সভাপতি জগত কলিতা, কেন্দ্ৰীয় কাৰ্যনিৰ্বাহক সদস্য জীৱেশ্বৰ বৰা, সদৌ অসম সাংবাদিক সন্থাৰ সভাপতি জিতু শৰ্মা ৰাজখোৱাৰ উপৰিও দলটোৰ  জিলা সমিতিৰ সমূহ বিষয় ববীয়া উপস্থিত থাকে।

অনুষ্ঠানত বোকাখাতৰ বিশিষ্ট সাহিত্যিক অপুৰ্ব বৰদলৈ আৰু অসম গণ পৰিষদ দলৰ প্ৰাক্তন জিলা সভাপতি অতুল শইকীয়াই নাগৰিকত্ব সংশোধনী বিধায়কৰ বিৰুদ্ধে স্বাক্ষৰ প্ৰদান কৰি গণ স্বাক্ষৰ অভিযানৰ শুভাৰম্ভ কৰে।

অগপৰ এই গণ স্বাক্ষৰ অভিযানৰ প্ৰতি সহাঁৰি জনায় সহস্ৰাধিক লোকে স্বতৰ্স্ফুত ভাৱে নাগৰিকত্ব সংশোধনী বিধেয়কৰ বিৰোধিতা কৰি স্বাক্ষৰ প্ৰদান কৰা দেখা যায়।

বোকাখাতত আজিৰে পৰা আৰম্ভ কৰা এই গণ স্বাক্ষৰ অভিযান অসম গণ পৰিষদ দলৰ বোকাখাতৰ ২১ খন আঞ্চলিকত পৰৱৰ্তী সময়ত আৰম্ভ হব আৰু দলটোৱে বোকাখাত সমষ্টিত ৫০ হেজাৰ লোকৰ স্বাক্ষৰ সংগ্ৰহ কৰি নাগৰিকত্ব সংশোধনী বিধেয়কৰ প্ৰতিবাদ জনাব।