নাগৰিকত্ব সংশোধনী বিধেয়কৰ বিৰোধিতাৰে বোকাখাতত আছুৰ জোঁৰ সমদল

সমগ্ৰ ৰাজ্যৰ বিভিন্ন প্ৰান্তৰ লগতে নাগৰিকত্ব সংশোধনী বিধেয়কৰ বিৰোধিতাৰে আজি সন্ধিয়া বোকাখাততো সদৌ অসম ছাত্ৰ সন্থাৰ উদ্যোগত এক বিশাল জোঁৰ সমদল বাহিৰ কৰা হয়।

সমদলত অংশগ্ৰহণকাৰী সকলে ‘বিজেপি গ’ বেক,  সৰ্বানন্দ সোণোৱাল হায় হায়,  বাংলাদেশী হুঁচিয়াৰ’ ধ্বনিৰে বোকাখাতৰ আকাশ বতাহ উত্তাল কৰি তোলে।

বোকাখাতৰ ৰাজহুৱা খেলপথাৰৰ পৰা উলিওৱা এই জোঁৰ সমদল বোকাখাত চহৰ পৰিভ্ৰমী সামৰণী পৰে ৷ জোঁৰ সমদলৰ পিছত বোকাখাতৰ চিকুন আতা থানৰ তোৰণৰ সমীপত এক প্ৰতিবাদী সভা অনুষ্ঠিত হয় ৷ অনুষ্ঠানত আছুৰ বোকাখাত মহকুমা আৰু গোলাঘাট জিলাৰ কৰ্মকৰ্তাৰ লগতে আটছা,  গোৰ্খা ছাত্ৰ সন্থা, আটাছু আদি বিভিন্ন সংগঠনৰ বিষয়ববীয়াই নাগৰিকত্ব সংশোধনী বিধেয়কৰ প্ৰতিবাদত উদাত্ত ভাষণ প্ৰদান কৰাৰ লগতে এই বিধায়কৰ বিৰোধিতা কৰাৰ বাবে সকলোকে আহ্বান জনায় ৷

আছুৰ এই জোঁৰ সমদলত বোকাখাতৰ মুঠ ২৬ টা দল সংগঠনে অংশ গ্ৰহণ কৰি হাতে হাতে জোঁৰ লৈ ৰাজপথলৈ ওলায় আহে।