সদৌ অসম আদিবাসী ছাত্ৰ সন্থা চমুকৈ ‘আছা’ৰ তিনিচুকীয়া জিলা সমিতিৰ সভাপতি ৰাজা কুজুৰৰ পৌৰোহিত্যত ডুমডুমা শাখা সাহিত্য সভা প্ৰেক্ষাগৃহত ১৬ মে’ত এখন গুৰুত্বপূৰ্ণ কাৰ্যনিৰ্বাহক সভা অনুষ্ঠিত হয়।
নাগৰিক (সংশোধনী) বিধেয়ক-২০১৬ বাতিল কৰিবলৈ কেন্দ্ৰীয় চৰকাৰৰ ওচৰত দাবী জনোৱাৰ উদ্দেশ্যে সভাৰ সিদ্ধান্ত মতে জিলাখনত থকা আছাৰ ১৪টা আঞ্চলিক আৰু ১৪০টা প্ৰাথমিক গোটৰ কৰ্মীসকলক লৈ (জিলা সমিতিসহ মুঠ ১৫৫টা) অহা ১৯ মে’ত তিনিচুকীয়াৰ কচুজান খেলপথাৰৰপৰা উপায়ুক্তৰ কাৰ্যালয়লৈ এটা প্ৰতিবাদী সমদল উলিয়াব। আৰু প্ৰতিটো গোটৰপৰা একোখনকৈ মুঠ ১৫৫ খন স্মাৰক-পত্ৰ জিলা উপায়ুক্তৰ যোগেদি যুটীয়া সংসদীয় সমিতিলৈ প্ৰেৰণ কৰাৰ সিদ্ধান্ত গ্ৰহণ কৰে।
তদুপৰি, অহা ২২ মে’ৰ সন্ধিয়া তিনিচুকীয়া চহৰত বিধেয়কখন বাতিলৰ দাবীত এটা জোঁৰ সমদল উলিয়াব বুলিও জানিবলৈ দিয়ে।
আনহাতে যোৱা ১৪ মে’ত সন্ধিয়া বিছাকুপি কেন্দ্ৰীয় চিকিৎসালয়ৰ সমীপত ৰাইডাং বাগিচাৰ এগৰাকী চাহ শ্ৰমিকক ধৰ্ষণ কৰি হত্যা কৰা দুৰ্বৃত্তৰ দলটোক অতি শীঘ্ৰে কৰায়ত্ত কৰিবলৈ সভাই দাবী জনোৱাৰ লগতে কৰ্মৰত চাহ শ্ৰমিক মহিলাসকলৰ নিৰাপত্তা নিশ্চিত কৰিবলৈও দাবী জনাই প্ৰস্তাৱ গ্ৰহণ কৰা হয়।
