নাগৰিকত্ব সংশোধনী বিধেয়ক-২০১৬কে ধৰি কেন্দ্ৰৰ নৰেন্দ্ৰ মোদি নেতৃত্বাধীন চৰকাৰ আৰু ৰাজ্যৰ সৰ্বানন্দ সোণোৱাল নেতৃত্বাধীন মিত্ৰজোঁট চৰকাৰৰ জনবিৰোধী আৰু জাতীয় স্বাৰ্থ-বিৰোধী নীতি, সাম্প্ৰদায়িক বিভাজনৰ ৰাজনীতি আৰু ইয়াৰ স্বৈৰতান্ত্ৰিক প্ৰৱণতাৰ বিৰুদ্ধে ঐক্যবদ্ধ আন্দোলন গঢ়ি তোলাৰ বাবে অহা ২৩ মে’ বুধবাৰে নলবাৰী নাট্য মন্দিৰ প্ৰাংগনত এক বৃহৎ প্ৰতিবাদী সমাৱেশ আয়োজন কৰা হৈছে।
উল্লেখ্য যে ‘জন একতা, জন অধিকাৰ আন্দোলন’ শীৰ্ষক শ্ল’গানৰ আধাৰত দেশজুৰি হ’বলগা আন্দোলনৰ অংশ হিচাপে নলবাৰীত এই প্ৰতিবাদী সমাৱেশৰ আয়োজন কৰা হৈছে। নিখিল ভাৰত কৃষক সভাৰ নলবাৰী জিলা সমিতি, ভাৰতৰ ছাত্ৰ ফেডাৰেচন (এছ এফ আই) নলবাৰী জিলা সমিতি, ভাৰতৰ গণতান্ত্ৰিক যুৱ ফেডাৰেচন (ডি ৱাই এফ আই) জিলা সমিতি, নিখিল ভাৰত গণতান্ত্ৰিক মহিলা সমিতি (এ আই ডি ডব্লিউ এ) আৰু চি আই টি ইউৰ নলবাৰী জিলা সমিতিৰ উদ্যোগত কাইলৈ দিনৰ ১০-৩০ বজাত সমাৱেশ অনুষ্ঠিত কৰা হ’ব।
সোমবাৰে কৃষক সভাৰ নেতা ৰবীন মিশ্ৰ, ডি ৱাই এফ আইৰ প্ৰদীপ শৰ্মা, এছ এফ আইৰ মৌচুমী গোস্বামী, চি আই টি ইউৰ মহেশ্বৰ দত্ত আৰু নিখিল ভাৰত গণতান্ত্ৰিক মহিলা সমিতিৰ মঞ্জু মিশ্ৰই এই প্ৰতিবাদী কাৰ্যসূচীত সংগঠনকেইটাৰ সমৰ্থক তথা জিলাখনৰ সকলো ৰাইজৰ অংশগ্ৰহণৰ বাবে এক বিবৃতিযোগে অনুৰোধ জনায়।
জানিব পৰা মতে বুধবাৰৰ সমাৱেশত সংগঠনকেইটাই নাগৰিকত্ব সংশোধনী বিধেয়ক বাতিল কৰাকে ধৰি মুঠ এঘাৰটা দাবী উত্থাপন কৰিব বুলি বিবৃতিটোত উল্লেখ কৰিছে।
