”নাগৰিকত্ব সংশোধনী বিধেয়ক, ২০১৬ গৃহীত হ’লে সদৌ অসম ছাত্ৰ সন্থাই চৰকাৰৰ বিৰুদ্ধে আদালতৰ দ্বাৰস্থ হ’ব। সংশোধনী আইনৰ বিৰুদ্ধে আমাৰ আন্দোলন পূৰ্ণ গতিত চলি আছে আৰু ধৰ্মৰ নামত নাগৰিকত্ব প্ৰদান কৰি বিদেশী হিন্দু বাংলাদেশী সংস্থাপনৰ যি যোজা চলাই আছে সেই কাৰ্য আমি ছাত্ৰ সন্থাই কেতিয়াও মানি নলও।” এই মন্তব্য সদৌ অসম ছাত্ৰ সন্থাৰ কেন্দ্ৰীয় সমিতিৰ উপসভাপতি মণিমাধৱ মহন্তৰ।
সদৌ অসম ছাত্ৰ সন্থাৰ নগাঁও জিলা সমিতিৰ অন্তৰ্গত বটদ্ৰৱা আঞ্চলিক ছাত্ৰ সন্থাৰ বাৰ্ষিক অধিৱেশনত উপস্থিত থাকি মণিমাধৱ মহন্তই এই কথা উল্লেখ কৰে।
বটদ্ৰৱা শ্ৰীশ্ৰী শংকৰদেৱ উচ্চতৰ মাধ্যমিক বিদ্যালয়ৰ প্ৰেক্ষাগৃহত আয়োজিত অধিৱেশনখন সভাপতিত্ব কৰে বটদ্ৰৱা আঞ্চলিক ছাত্ৰ সন্থাৰ সভাপতি তপন কলিতাই। ইয়াৰ উপৰি নগাঁও জিলা সমিতিৰ সভাপতি অভিজিত দাস, উপসভাপতি গৌৰি শংকৰ শইকীয়া, সাংগঠনিক সম্পাদক নৱজোতি শইকীয়া, ভাৰপ্ৰাপ্ত সাধাৰণ সম্পাদক অমৰ জোতি ফুকন, বটদ্ৰৱা শ্ৰীশ্ৰী শঙ্কৰদেৱ উচ্চতৰ মাধ্যমিক বিদ্যালয়ৰ অধ্যক্ষ অনিল শইকীয়া, শিক্ষক দিপাংক গিৰি দেৱগোস্বামীৰ লগতে বটদ্ৰৱাৰ বিভিন্ন শিক্ষানুষ্ঠানৰ প্ৰায় সহস্ৰাধিক ছাত্ৰ-ছাত্ৰী উপস্থিত থাকে।
ইফালে উক্ত অধিৱেশনৰ জৰিয়তে তপন কলিতাক সভাপতি, নিপুমণি দেৱগোস্বামী সম্পাদক হিচাপে লৈ বটদ্ৰৱা আঞ্চলিক ছাত্ৰ সন্থাৰ নতুন সমিতিখন গঠন কৰা হয়।
উল্লেখ্য যে বটদ্ৰৱা আঞ্চলিক ছাত্ৰ সন্থাৰ বাৰ্ষিক অধিৱেশন উপলক্ষে ৰাতিপুৱা পতাকা উত্তোলন আৰু চহিদ তৰ্পন কাৰ্যসূচীৰ শুভাৰম্ভণি কৰে লক্ষ্যদ্বীপ অধিকাৰীয়ে। ইয়াৰ পাছত গছ পুলি ৰোপন কাৰ্য সম্পাদন কৰে ইন্দ্ৰমোহন বৰুৱা, দিলীপ দেৱগোস্বামী আৰু বটদ্ৰৱা আৰক্ষীৰ ভাৰপ্ৰাপ্ত বিষয়া মনোৰঞ্জন গগৈয়ে।
আনহাতে দিনৰ ১১ বজাৰ পৰা আৰম্ভ হোৱা এক বৰ্ণিল সাংস্কৃতিক শোভাযাত্ৰা উদ্ধোধন কৰে অধ্যক্ষ অনিল শইকীয়াই। সন্ধিয়া ৬ বজাত অনুষ্ঠিত বন্তি প্ৰজ্বলন কাৰ্যসূচীৰে বাৰ্ষিক অধিৱেশনৰ সামৰণি পৰে।
