ৰঙালী বিহুৰ দিন চমু চাপি অহাৰ লগে লগে আকাশ বতাহ মুখৰিত কৰি ৰাজ্যৰ চৌদিশে এতিয়া চলিছে বিহু কৰ্মশালা। আন ঠাইৰ লগতে নামৰূপতো আৰম্ভ হৈছে ঢোল বাদন আৰু বিহু নাচৰ কৰ্মশালা । নামৰূপ ৰাজহুৱা খেলপথাৰত সোমবাৰৰ পৰা জিলা ছাত্ৰ সন্থাৰ সহযোগত বৰ্ণাঢ্য কাৰ্যসূচীৰে আৰম্ভ হৈছে এই কৰ্মশালা।
জিলা ছাত্ৰ সন্থাৰ সভপতি লিখন বৰুৱাই শুভাৰম্ভণি কৰা কৰ্মশালাখনত জিলাখনৰ প্ৰায় ২১০গৰাকী প্ৰশিক্ষাৰ্থীয়ে অংশগ্ৰহণ কৰে। ইয়াৰে ১৩০গৰাকী প্ৰশিক্ষাৰ্থীয়ে বিহু নাচৰ প্ৰশিক্ষণ গ্ৰহণ কৰাৰ লগতে বাকী ৮০গৰাকীয়ে ল’ব ঢোল বাদনৰ প্ৰশিক্ষণ।
উল্লেখ্য যে এই প্ৰশিক্ষাৰ্থীসকলক প্ৰশিক্ষণ দিব বিখ্যাত ঢোল বাদক তথা ঢোলৰ ওজা ভূপেন গগৈ আৰু বিহু নাচনি ৰিমাক্ষী দিহিঙিয়াই।
১২ এপ্ৰিললকৈ চলিব লগা এই কৰ্মশালাৰ সামৰণি পৰিব এক বৰ্ণাঢ্য সাংস্কৃতিক অনুষ্ঠানৰ মাজেৰে। সামৰণি নিশা বিভিন্ন সাংস্কৃতিক অনুষ্ঠানৰ পৰিৱেশন কৰিব কৰ্মশালাত প্ৰশিক্ষিত প্ৰশিক্ষাৰ্থীসকলে।
কৰ্মাশালাৰ শুভাৰম্ভণি অনুষ্ঠানত আছুৰ সভাপতি কল্পজ্যোতি গগৈ, সম্পাদক মানস জ্যোতি চাংমাই, আছু জিলা শিক্ষা সম্পাদক অবনী কুমাৰ গগৈ, আছু জিলা উপ সভাপতি জয়ন্ত দুৱৰাৰ লগতে বহু বিশিষ্ট ব্যক্তি উপস্থিত থাকে। ইয়াৰ উপৰি স্থানীয় অঞ্চলৰ বহু লোকো উপস্থিত থাকে কৰ্মশালাখনত।
