নামৰূপ চাইক্য গাঁও যুৱক সংঘৰ উদ্যোগত নামৰূপত কালি এক ব্যতিক্ৰমী বহাগী উৎসৱ অনুষ্ঠান উদযাপন কৰা হয়। এই অনুষ্ঠানৰ পৰাই যুৱক সংঘটোৱে বিশিষ্ট কণ্ঠশিল্পী দীপালী বৰঠাকুৰলৈ ২০ হেজাৰ টকাৰ সাহায্য আগবঢ়াই।
যি সময়ত অসমত বিহু সন্মিলন উদযাপনক লৈ এক ভয়ানক চান্দা সংস্কতিয়ে গা কৰি উঠিছে সেই সময়তে নামৰূপ চাইক্য গাঁওৰ যুৱকসকলে নিজৰ গাঁঠিৰ ধন ভাঙি বিহু উদযাপন কৰাৰ লগতে বহাগী উৎসৱৰ মঞ্চৰ পৰা দীপালী বৰঠাকুৰলৈ ২০ হেজাৰ টকাৰ এককালীন সাহায্য প্ৰদান কৰি ৰাইজৰ আস্থাভাজন হৈ পৰিছে।
উল্লেখযোগ্য যে উক্ত বিহু মঞ্চৰ পৰাই চাইক্য গাওঁ ৰাইজে সমগ্ৰ অসমৰ বিহু উদযাপন সমিতি সমূহলৈ বিহু উদযাপনৰ নামত ৰাইজৰ ধনৰ অপব্যৱহাৰ নকৰি প্ৰতিখন বিহু মঞ্চক একোটা গঠনমূলক কাৰ্য্যপন্থা হাতত লবলৈ আহ্বান জনায়।
দিনৰ ভাগত পতাকা উত্তোলন, স্মৃতি তৰ্পণ আদি অনুষ্ঠান অনুষ্ঠিত কৰাৰ পিছত সন্ধ্যা সংস্কৃতিক অনুষ্ঠান উদ্বোধন কৰে ডিব্ৰুগড় লোকসভা সমষ্টিৰ সাংসদ ৰামেশ্বৰ তেলীয়ে।
চাইক্য গাঁও অস্থায়ী প্ৰেক্ষাগৃহত অনুষ্ঠিত বৰ্ণাঢ্য সংস্কৃতিক সন্ধ্যাত প্ৰায় ২৫ হেজাৰ দৰ্শকৰ উপস্থিতিত একেলগে অসমৰ ২১ গৰাকী জনপ্ৰিয় শিল্পী কৃষ্ণমণি চুতীয়া, নীল আকাশ, আচুৰ্য বৰপাত্ৰগোহাঁই, গীতালি কাকতি, দীক্ষু, অক্ষয় পল আদিক উষ্ম সম্বৰ্ধনা জনোৱা হয়।
প্ৰত্যেকগৰাকী শিল্পীকে একোখনকৈ সম্বৰ্ধনা পত্ৰ, গামোচা, জাপি, শৰাই, গছ পুলি, আৰু এটা টকৌ পাতেৰে নিৰ্মিত টুপী প্ৰদান কৰা লগতে প্ৰত্যেকগৰাকী শিল্পীয়ে সাংস্কৃতিক সন্ধ্যাটোত দুটি কৈ গীত পৰিবেশন কৰে।
আনহাতে জনপ্ৰিয় শিল্পীক চাবলৈ হেতা-ওপৰা লগোৱা হেজাৰ হেজাৰ দৰ্শকক শৃংখলাবদ্ধ তথা নিয়ন্ত্ৰিত কৰাত নামৰূপৰ প্ৰশাসন সম্পূৰ্ণ ব্যৰ্থ হোৱা দেখা যায়।
