সমাজত নাৰীৰ বিৰুদ্ধে বৰ্ধিত অপৰাধৰ প্ৰতি লক্ষ্য ৰাখি ওদালগুৰি জিলা প্ৰশাসনে জিলাখনৰ কিছুমান নিৰ্বাচিত অংশ আৰু নিৰ্বাচিত জনাংশৰ মাজত সজাগতামূলক অভিযান আৰম্ভ কৰাৰ সিদ্ধান্ত কৰিছে।
এই কাৰ্য্যসূচীৰ অংশস্বৰূপে জিলা প্ৰশাসনে ইতিপূৰ্বে দুটা শিবিৰ অনুষ্ঠিত কৰিছে। ইয়াৰে এটা ১০ এপ্ৰিলত জিলাখনৰ মাজবাট থানাৰ অন্তৰ্গত মাজবাট চাহ বাগিচাত আৰু আনটো পেনেৰী আৰক্ষী থানাৰ অন্তৰ্গত গুৰাঝাৰত ১২ এপ্ৰিলত অনুষ্ঠিত হয়।
সূত্ৰটোৱে জনোৱা মতে অহা ১৭ এপ্ৰিলত ডিমাকুচি আৰক্ষী থানাৰ অন্তৰ্গত আঠেৰিঘাত একে ধৰণৰ আন এটা সজাগতাৰ কাৰ্য্যসূচী অনুষ্ঠিত কৰা হ’ব। তাৰ পিছত অহা ২০ এপ্ৰিলত ৰৌতা আৰক্ষী চকীৰ অন্তৰ্গত ইকৰাবাৰী আৰু ফাঁকিদিয়াত এই কাৰ্য্যসূচী ৰূপায়ণ কৰা হ’ব। শেষত অহা ২৪ এপ্ৰিলত কলাইগাওঁ আৰক্ষী চকীৰ অন্তৰ্গত কলাইগাৱঁত এই কাৰ্য্যসূচী ৰূপায়ণ কৰা হ’ব।
জিলা প্ৰশাসনৰ সূত্ৰটোৱে জনোৱামতে অভিযানটোত জিলাৰ আৰক্ষী অধীক্ষক, জিলাৰ আইনী সেৱা প্ৰাধিকাৰী, সমাজ কল্যাণ বিষয়া, বিভিন্নটা স্বেচ্ছাসেৱী সংস্থা, মহিলা সংগঠন আৰু কেইবাটাও চৰকাৰী-বেচৰকাৰী সংস্থাই এই অভিযানত অংশগ্ৰহণ কৰিছে।
উল্লেখযোগ্য যে যোৱা কেইমাহত গোটেই দেশৰ লগতে ৰাজ্যখনতো উদ্বেগজনকভাৱে বৃদ্ধি পাইছে মহিলাৰ বিৰুদ্ধে অপৰাধৰ সংখ্যা, বিশেষকৈ ধৰ্ষণ আৰু হত্যাৰ ঘটনা।
