নাৰী নিৰ্যাতন সম্পৰ্কে সজাগতা সৃষ্টিৰ উদ্দেশ্যে হোজাইত আইন সজাগতা সভা
নাৰী নিৰ্যাতন সম্পৰ্কে সজাগতা সৃষ্টিৰ উদ্দেশ্যে হোজাই জিলা প্ৰশাসনে কালি অৰ্থাৎ দেওবাৰে হোজাই নগৰৰ দেশ বন্ধু বিদ্যাপীঠ হাই স্কুল প্ৰাংগণত এখন আইন সজাগতা সভা অনুষ্ঠিত কৰে।
এই উপলক্ষে সংবাদ মাধ্যমৰ আগত হোজাইৰ অতিৰিক্ত আৰক্ষী অধীক্ষক কাকলি বৰুৱা আৰু ভাৰপ্ৰাপ্ত আৰক্ষী বিষয়া কিটেশ্বৰ বনিয়াই কয়, ‘এই সভাখন মূলত মহিলা আৰু যুৱতী সকলক তেওঁলোকৰ বিৰুদ্ধে চলি অহা অত্যাচাৰ সম্পৰ্কে সজাগ কৰিবলৈ আয়োজন কৰা হৈছে।’
মহিলা সকলে যাতে নিজৰ অধিকাৰ সম্পৰ্কে সজাগ হোৱাৰ লগতে ঘৰুৱা হিংসাৰ বিৰুদ্ধে থিয় দিব পাৰে তাৰ ওপৰতো উক্ত সভাত গুৰুত্ব দিয়া হয় বুলি তেওঁলোকে জানিবলৈ দিয়ে।
আনহাতে এই সভাতে এন আৰ চি প্ৰসংগ উল্লেখ কৰি তেওঁলোকে কয়, ‘অহা ৩০ জুনত প্ৰকাশ পাব লগীয়া এন আৰ চি চূড়ান্ত খচৰা সম্পৰ্কেও ইয়াত আলোচনা কৰা হয়। ৰাইজে এইক্ষেত্ৰত মুঠেও আতংকিত হ’ব নালাগে, এই সম্পৰ্কত কিবা জানিব খোজিলে তেওঁলোকে আমাক যোগাযোগ কৰিব পাৰে।’
প্ৰায় ৫০০ গৰাকী মহিলা আৰু যুৱতীয়ে অংশ গ্ৰহণ কৰা উক্ত সভাত শিক্ষাবিদ কমল দত্ত, হোজাই ছোৱালী মহাবিদ্যালয়ৰ সুমিটা দেবনাথৰ লগতে বহু কেইগৰাকী বক্তাই ভাষণ প্ৰদান কৰে।