নৃশংসতাৰ বীভৎস ৰূপ : চিৰাং জিলাত খেতিপথাৰত কাম কৰি থকা মহিলাক হাত, ভৰি, ডিঙি কাটি হত্যা

মঙলবাৰে চিৰাং জিলাৰ পাণবাৰী থানাৰ অন্তৰ্গত বউপাৰাত সংঘটিত হৈছে এটা নৃশংস হত্যাকাণ্ড। কোনো অচিনাক্ত মানৱ ৰূপি দানৱে এগৰাকী মহিলাৰ শৰীৰৰ বিভিন্ন অংশ কাটি হত্যা কৰা ঘটনাই উক্ত অঞ্চলটোত তীব্ৰ চাঞ্চল্য বিৰাজ কৰিছে।

জানিব পৰা মতে মহিলাগৰাকীয়ে মুকলি পথাৰৰ কেৰেলা খেতিত কাম কৰি থাকোতে দুৰ্বৃত্তই কোনো নথকাৰ সুযোগত নৃশংসভাৱে হত্যা কৰি মৃতদেহটো পথাৰতে পেলাই থৈ যায়। ঘটনাটো সংঘটিত কৰিয়ে ঘটনাস্থলীৰ পৰা পলাই যাবলৈ সক্ষম হয় অচিনাক্ত দুৰ্বৃত্ত।

ইফালে দুটা সন্তানৰ মাতৃ মৃত মহিলাগৰাকী উক্ত অঞ্চলৰে আমিৰ হামজাৰ পত্নী শাহিদা খাতুন বুলি চিনাক্ত কৰা হৈছে।

পিছত হত্যাকাণ্ডৰ খবৰ পাই পাণবাৰী আৰক্ষী, বিজনী আৰক্ষীৰ বিষয়াসকল ঘটনাস্থলীত উপস্থিত হৈ মৃতদেহ মৰণোত্তৰ পৰীক্ষাৰ বাবে প্ৰেৰণ কৰে।

উল্লেখ্য যে হত্যা সন্দৰ্ভত আৰক্ষীয়ে সংবাদ মাধ্যমক জানিবলৈ দি কয় যে এতিয়ালৈ আমি হত্যাকাৰীক কৰায়ত্ত কৰিব পৰা নাই। কিন্তু অতি শীঘ্ৰে দুৰ্বৃত্তক কৰায়ত্ত কৰিবলৈ সক্ষম হ’ম। লগতে হত্যাকাৰীৰ সন্ধানত আৰক্ষীয়ে অভিযান তীব্ৰতৰ কৰি তোলা বুলিও জানিবলৈ দিয়ে।