পুনৰ আন্তঃৰাষ্ট্ৰীয় স্তৰত জিলিকি উঠিছে বিশিষ্ট অভিনেতা তথা অসম সন্তান আদিল হুছেইন।
প্ৰাপ্ত তথ্য মতে উৰ্দু আৰু নৰৱেজিয়ান ভাষাত নিৰ্মিত ‘What Will People Say’ নামৰ চলচ্চিত্ৰখনত কৰা দূৰ্দান্ত অভিনয়ৰ বাবে এইবাৰ অভিনেতাজনলৈ নৰৱেৰ প্ৰসিদ্ধ ক’ছমৰামা চলচ্চিত্ৰ মহোৎসৱত শ্ৰেষ্ঠ অভিনেতাৰ বঁটা (কেনন বঁটা) প্ৰদান কৰা হৈছে।
অভিনেতা জনৰ উপৰি চলচ্চিত্ৰখনৰ পৰিচালক ইৰাম হকলৈ শ্ৰেষ্ঠ পৰিচালক আৰু শ্ৰেষ্ঠ চিত্ৰনাট্যকাৰৰ বঁটা প্ৰদান কৰাৰ লগতে চলচ্চিত্ৰখনৰ প্ৰযোজক মাৰিয়া একাৰহভদে শ্ৰেষ্ঠ প্ৰযোজকৰ বঁটা লাভ কৰিছে।
উল্লেখযোগ্য যে মুক্তি ভৱন নামৰ হীন্দি চলচ্চিত্ৰখনত কৰা অনবদ্য অভিনয়ৰ বাবে আন্তঃৰাষ্ট্ৰীয় খ্যাতিসম্পন্ন অভিনেতাজনে ৰাষ্ট্ৰীয় সংবাদ মাধ্যম এন ডি টি ভিৰ ফালৰ পৰা প্ৰকাশিত ২০১৭ বৰ্ষৰ দহজন শ্ৰেষ্ঠ অভিনেতাৰ মাজত চতুৰ্থ স্থান লাভ কৰিবলৈ সক্ষম হৈছিল।
ইয়াৰ উপৰি মাজৰাতিৰ কেতেকী আৰু মুক্তিভৱনত নামৰ কৰা অভিনয়ৰ বাবে অভিনেতাজনক ২০১৭ চনৰ ৰাষ্ট্ৰীয় পুৰস্কাৰত বিশেষভাৱে সন্মানিত কৰা হৈছিল।
