পাপনৰ চুম্বন কাণ্ডৰ বিতৰ্ক চলি থকাৰ মাজতে আজি শিল্পীগৰাকীৰ সমৰ্থনত তেওঁৰ কিছু সংখ্যক অনুৰাগী ওলাই অহা দেখা গ’ল। সদৌ অসম পাপনিষ্ট নামৰ অনুৰাগী সংঘ এটাই আজি পাপনে নাবালিকা ছোৱালী এজনীক চুম্বন কৰা দৃশ্য সম্বলিত এই ভিডিঅ’টো আংশিকভাৱে প্ৰচাৰ কৰি আৰু ইয়াৰ সৈতে অশ্লীল শব্দৰ শিৰোনাম দি ফেচবুক পেইজত আপলোড কৰি পাপনক বদনামী কৰিবলৈ চেষ্টা কৰা বুলি দিচপুৰ আৰক্ষী থানাত এজাহাৰ দিয়ে।
এজাহাৰ খনত এটা বাতৰি চেনেল তথা ফেচবুক পেইজৰ বিৰুদ্ধে পাপনিষ্টসকলে এই অভিযোগ আনিছে। কিন্তু হাস্যকৰ কথাটো হ’ল অসমীয়াতে লিখা, এশটামান শব্দৰ এই এজাহাৰখনত ভুলৰ সংখ্যা আৰু ধৰণে আমোদ দিব পাৰে বহুতকে।
লগতে ভবাই তুলিছে আমাৰ নৱ প্ৰজন্ম কেনেকুৱা স্তৰৰ জ্ঞানৰ অধিকাৰী।
তেওঁলোকে এজাহাৰখনত লিখা কেতবোৰ শব্দ ‘হলি ছেলিভেছন’, ‘এজনী ১১ বছৰীয়াই ছোৱালী প্ৰতিযোগে গালত’, ‘ৰং শাণি’, ‘ফেছবুক প্ৰেছত’, ‘বিক্ৰীত মন্তব্য’, ‘ব্যপি কৰে’, ‘সমাজত বিৰূৎ প্ৰভা পেলাই’।
এইবোৰ হাস্যকৰ ভুলেৰে লিখিয়ে এৰা নাই এজাহাৰ দিওঁতাসকলে। শেষত স্বাক্ষৰকাৰীসকলৰ এজনে নিজৰ নামৰ আগত ঁ (চন্দ্ৰবিন্দু) ও লগাই দিছে, যিটোৰে ‘স্বৰ্গীয়’ অৰ্থ বুজোৱা হয়, অৰ্থাৎ মৃত লোকৰ নামৰ আগতহে যিটো ব্যৱহাৰ কৰা হয়।
উল্লেখযোগ্য যে যোৱা ২০ ফেব্ৰুৱাৰিত এটা ৰিয়েলিটি শ্বৰ সময়ত অসমৰ জনপ্ৰিয় গায়ক পাপন অংগৰাগ মহন্তই এগৰাকী নাবালিকাক আপত্তিকৰভাৱে চুমা খোৱাক লৈ ৰাজ্যৰ সৰ্বত্ৰে ব্যাপক প্ৰতিক্ৰিয়াৰ সৃষ্টি হৈছে। লগতে এই আচৰণৰ বিৰুদ্ধে ব্যৱস্থা গ্ৰহণৰ বাবে অভিযোগ দিছে।
