পৃথক কামতাপুৰৰ দাবীত আক্ৰাছুৰ ২৪ ঘণ্টাীয়া অসম বন্ধৰ মিশ্ৰিত প্ৰভাৱ কোকৰাঝাৰত
কেন্দ্ৰীয় আৰু ৰাজ্য চৰকাৰে কোচ-ৰাজবংশী জনগোষ্ঠীৰ জনজাতিকৰণ আৰু পৃথক কামতাপুৰ ৰাজ্য গঠনৰ ক্ষেত্ৰত দেখাই অহা চৰম প্ৰতাৰণাৰ প্ৰতিবাদত সদৌ অসম কোচ-ৰাজবংশী ছাত্ৰ সন্থাই সোমবাৰে আহ্বান জনোৱা ২৪ ঘণ্টীয়া অসম বন্ধৰ মিশ্ৰিত প্ৰভাৱ পৰে বি টি চিকে ধৰি নামনি অসমৰ বিভিন্ন অঞ্চলত।
কালি পূৱা পাঁচ বজাৰ পৰা আহ্বান জনোৱা অসম বন্ধৰ বন্ধৰ সময়চোৱাত বি টি চিৰ প্ৰানকেন্দ্ৰ কোকৰাঝাৰ চহৰত যাত্ৰীবাহী বাহন সমূহৰ লগতে অঞ্চলটোৰ একাংশ দোকান পোহাৰ সম্পূৰ্ণ ৰুপে বন্ধ হৈ পৰাত চহৰখনৰ স্বাভাৱিক জীৱন জাত্ৰা ব্যাহত হৈ পৰে। অৱশ্যে কমসংখ্যক ব্যক্তিগত বাহন আৰু একাংশ শাক-পাচলি বজাৰ খোলা থকা পৰিলক্ষিত হয়।
কোকৰাঝাৰ চহৰৰ লগতে ইয়াৰ দাঁতিকাষৰীয়া অঞ্চল যেনে চন্দ্ৰপাৰা, হল্টুতিনালী আদিতো দোকান- বজাৰ সম্পূৰ্ণ বন্ধ থাকে। ঠায়ে ঠায়ে বন্ধৰ সমৰ্থকে ৰাজপথলৈ ওলাই টায়াৰ আদি জ্বলাই প্ৰতিবাদ সাব্যস্ত কৰাৰ লগতে চৰকাৰ বিৰোধী শ্ল’গানেৰে পৰিবেশ উত্তাল কৰি তোলে যদিও বন্ধৰ প্ৰতি লক্ষ্য ৰাখি কোকৰাঝাৰ আৰক্ষীয়ে নিৰাপত্তা ব্যৱস্থা কটকটীয়া কৰি তোলাৰ ফলত বিশেষ কোনো ধৰণৰ অপ্ৰিতিকৰ ঘটনা সংঘটিত নহ’ল।
আনহাতে নামনি অসমৰ আন কেতবোৰ ঠাইত দুই এক বিক্ষিপ্ত হিংসাত্মক ঘটনা সংঘটিত হোৱাৰ খবৰ পোৱা গৈছে, উক্ত ঠাইসমূহত বন্ধ সমৰ্থকে শিলগুটি আদি নিক্ষেপ কৰি যান-বাহনৰ ওপৰত আক্ৰমণ চলাই, অৱশ্যে ঘটনাস্থলীত উপস্থিত হৈ আৰক্ষীয়ে পৰিস্থিতি নিয়ন্ত্ৰণ কৰে।