কাছাৰ জিলাৰ উধাৰবন্দ সমষ্টিৰ পাংগ্ৰামত থকা লাডী ষ্টীল ইণ্ডাষ্ট্ৰিয়েল ইউনিটত ৰবিবাৰে পুৱা ১১ বাজি ৩ মিনিটত হোৱা এক ভয়াৱহ বিস্ফোৰণত চাৰিজন শ্ৰমিকৰ মৃত্যু হোৱাৰ লগতে আন এজন শ্ৰমিক সামান্যভাৱে আহত হৈছে। ঘটনাৰ খবৰ পোৱাৰ লগে লগে জিলা প্ৰশাসন আৰু আৰক্ষী বিভাগৰ উচ্চপদস্থ বিষয়াসকলৰ লগতে ৰাষ্ট্ৰীয় দুৰ্যোগ প্ৰশমন বাহিনীৰ কৰ্মীসকল কাৰখানাখনত উপস্থিত হয়গৈ। স্থানীয় বাসিন্দা আৰু কাৰখানাৰ আন শ্ৰমিকসকলেও মৃতদেহ উদ্ধাৰ কাৰ্যত প্ৰশাসনক সহায় আগবঢ়ায়।
কাছাৰৰ উপায়ুক্ত ৰাহুল কুমাৰ গুপ্তা আৰু জ্যেষ্ঠ আৰক্ষী অধীক্ষক সঞ্জীৱ শইকীয়াৰ সৈতে ততাতৈয়াকৈ ঘটনাস্থলীত উপস্থিত হৈ কেবিনেট মন্ত্ৰী কৌশিক ৰায়ে কয় যে বিস্ফোৰণৰ সঠিক কাৰণ এতিয়াও নিশ্চিত হোৱা নাই। মন্ত্ৰীগৰাকীয়ে কয়, “কোনো শ্ৰমিক প্ৰাংগণৰ ভিতৰত আৱদ্ধ হৈ থকাৰ সম্ভাৱনা নাকচ কৰিবলৈ এন ডি আৰ এফৰ কৰ্মীসকলক কাৰখানাৰ চৌহদত পূৰ্ণাংগ তালাচী চলাবলৈ নিৰ্দেশ দিয়া হৈছে। আমাৰ তাৎক্ষণিক অগ্ৰাধিকাৰ আছিল আহতসকলক উদ্ধাৰ কৰা আৰু স্থানকণ সুৰক্ষিত কৰা। এক বিস্তৃত তদন্তৰ জৰিয়তে বিস্ফোৰণৰ কাৰণ আৰু শ্ৰমিকসকলৰ সুৰক্ষাৰ ব্যৱস্থাত কোনো ত্ৰুটি আছিল নেকি, সেয়া নিৰ্ণয় কৰা হ’ব।”
‘দ্য আছাম ট্ৰিবিউন’ৰ সৈতে হোৱা এক বাৰ্তালাপত উধাৰবন্দৰ বিধায়ক ৰাজদীপ গোৱালাই কয় যে নিহত চাৰিজনৰ ভিতৰত তিনিজন স্থানীয় বাসিন্দা আছিল, আনহাতে চতুৰ্থজন এগৰাকী বাহন চালক আছিল যি ত্ৰিপুৰাৰ বাসিন্দা। তেওঁ কয়, “মৃতদেহসমূহ ময়নাতদন্তৰ বাবে শিলচৰ চিকিৎসা মহাবিদ্যালয় হাস্পতাললৈ প্ৰেৰণ কৰা হৈছে। আহত শ্ৰমিকজনৰ উধাৰবন্দ চিকিৎসালয়ত চিকিৎসা চলি আছে আৰু তেওঁ বৰ্তমান আশংকামুক্ত।”
কাছাৰ জিলা প্ৰশাসনে সমগ্ৰ ঘটনাটোৰ সন্দৰ্ভত এক দণ্ডাধীশ পৰ্যায়ৰ তদন্তৰ নিৰ্দেশ দিছে। ইয়াৰ লগতে কাছাৰ আৰক্ষী আৰু শ্ৰম বিভাগে বিস্ফোৰণৰ কাৰণ তথা কাৰখানাটোৰ সুৰক্ষা ব্যৱস্থা সম্পৰ্কে পৃথকে পৃথকে তদন্ত আৰম্ভ কৰিছে। সংবাদ মাধ্যমৰ প্ৰশ্নৰ উত্তৰত মন্ত্ৰী ৰায়ে কয় যে তদন্তৰ আওতাত স্থানীয় বাসিন্দাসকলৰ সেই দাবীও অন্তৰ্ভুক্ত কৰা হ’ব, য’ত তেওঁলোকে পূৰ্বেও কাৰখানাটোত সৰু বিস্ফোৰণ ঘটা বুলি অভিযোগ কৰিছে। তেওঁ কয়, “এনে ঘটনা যদি সঁচাকৈয়ে ঘটিছিল আৰু প্ৰশাসনক অৱগত কৰা হোৱা নাছিল, তেন্তে সেই দিশটোও তদন্তৰ পৰিসৰলৈ অনা হ’ব। এই তদন্তই উদ্যোগটোৰ কাৰ্য-পৰিচালনা, শ্ৰমিকৰ সুৰক্ষা ব্যৱস্থা আৰু দুৰ্ঘটনাটোৰ সৈতে জড়িত সকলো দিশ সামৰি ল’ব।”
ইফালে, কাছাৰ আৰক্ষীয়ে জেৰাৰ বাবে কাৰখানাটোৰ পৰিচালক আৰু পৰিচালনা বিভাগৰ আন কৰ্মচাৰীসকলক আটক কৰিছে। বিধায়ক গোৱালাই সদৰী কৰা মতে, বাহিৰত থকা বুলি জানিব পৰা কাৰখানাৰ মালিকসকলক সোমবাৰে তদন্তকাৰী বিষয়াসকলৰ সন্মুখত উপস্থিত হ’বলৈ নিৰ্দেশ দিয়া হৈছে। আনহাতে, সহকাৰী শ্ৰম আয়ুক্তই কৰ্মক্ষেত্ৰৰ পৰিস্থিতি, বিধিবদ্ধ সুৰক্ষা ব্যৱস্থা আৰু শ্ৰমিকসকলক প্ৰদান কৰা সা-সুবিধাৰ সম্পৰ্কে এক সুকীয়া তদন্ত চলাব। কাছাৰৰ জ্যেষ্ঠ আৰক্ষী অধীক্ষক সঞ্জীৱ শইকীয়াই কয় যে এখন প্ৰাথমিক এজাহাৰ (FIR) ৰুজু কৰি আনুষ্ঠানিক তদন্ত আৰম্ভ কৰা হ’ব। গুৱাহাটীৰ পৰা যোৱা ফৰেনছিক বিশেষজ্ঞৰ এটা দলে ঘটনাস্থলী পৰিদৰ্শন কৰি নমুনা সংগ্ৰহ কৰাৰ লগতে বিস্ফোৰণৰ সঠিক কাৰণ ফাদিল কৰিব বুলি আশা কৰা হৈছে।
জিলা প্ৰশাসনে নিহত শ্ৰমিকসকলৰ পৰিয়ালৰ বাবে অতিৰিক্ত ক্ষতিপূৰণ সুনিশ্চিত কৰিবলৈ কাৰখানা কৰ্তৃপক্ষৰ সৈতেও আলোচনা আৰম্ভ কৰিছে। ঘটনাটোৰ প্ৰকৃত কাৰণ আৰু সুৰক্ষা ব্যৱস্থাৰ ত্ৰুটি সম্পৰ্কীয় তদন্ত অব্যাহত থকাৰ মাজতে এই ভয়ংকৰ দুৰ্ঘটনাটোৱে ৰাজ্যখনৰ ক্ষুদ্ৰ আৰু মজলীয়া উদ্যোগসমূহত শ্ৰমিকৰ সুৰক্ষা ব্যৱস্থাৰ বিষয়টোলৈ নতুনকৈ সকলোৰে দৃষ্টি আকৰ্ষণ কৰিছে।
