গুৱাহাটীৰ অসম ৰাজ্যিক চিৰিয়াখানা ( Assam State Zoo cum Botanical Garden )ত চিৰিয়াখানাৰ বিষয়াই হৰিণা ভক্ষণ কৰা বুলি চিৰিয়াখানা সুৰক্ষা মঞ্চই অনা গুৰুতৰ অভিযোগ চিৰিয়াখানাৰ ডি এফ অ’ই ‘ভিত্তিহীন’ বুলি নৰ্থ ইষ্ট নাওত মন্তব্য কৰাৰ পিছত আজি ২২ এপ্ৰিলত পুনৰ বিষয়টো লৈ সৰৱ হোৱা মঞ্চটোৱে চি বি আই তদন্ত দাবী কৰিছে।
‘এটা দুটা নহয় শ শ হৰিণ’ ভক্ষণ কৰা হৈছে বুলি দাবী কৰি আজি সংগঠনটোৱে কয় যে ‘পৃথিৱীৰ কোনো চিৰিয়াখানাতে এনে ঘটনা হোৱা নাই। আমি ইয়াৰ চি বি আই তদন্ত দাবী কৰিছো।’
বিষয়টো লৈ অহা ৬ মে’ত এখন নাগৰিক সভা আয়োজন কৰা হৈছে বুলি জানিবলৈ দি আজিৰ সংবাদমেলত মঞ্চই কয় যে নাগৰিক সভাৰ পিছতে চি বি আই তদন্তৰ দাবীত তেওঁলোকে এখন স্মাৰক পত্ৰ প্ৰেৰণ কৰিব।
হৰিণাৰ সংখ্যা ৬ মাহ আগলৈকে ১২০০ টা আছিল বুলি চিৰিয়াখানা সুৰক্ষা মঞ্চই কৰা দাবী নস্যাৎ কৰি বিষয়া টেৰজ মৰিস্বামীয়ে নৰ্থ ইষ্ট নাওক ‘চিৰিয়াখানাত আৰম্ভণিৰে পৰা ১২০০ টা হৰিণ নাই। যদি তেওঁলোকৰ হাতত ১২০০ টা হৰিণ থকাৰ তথ্য আছে তেন্তে আমি শাস্তি ল’বলৈও প্ৰস্তুত’ বুলি কৰা মন্তব্যত জাঙুৰ খাই উঠিছে সংগঠনটো।
চিৰিয়াখানাৰ হৰিণ ভক্ষণৰ অভিযোগ আৰু প্ৰত্যুত্তৰৰ নৰ্থ ইষ্ট নাও এক্সক্ল্যুছিভ ভিডিঅ’ চাওক।
নৰ্থ ইষ্ট নাওৰ সৈতে হোৱা সাক্ষাৎকাৰত চিৰিয়াখানাত থাকিব লগাতকৈ বেছিহে হৰিণ আছে বুলি মৰিস্বামীয়ে ‘আমি পি চি এফলৈ পত্ৰ প্ৰেৰণ কৰিছো যে হৰিণৰ সংখ্যা ৫০০ হোৱাটো বহুত বেছি গতিকে আমি ইয়াক মুকলি কৰি দিয়াৰ অনুমতি দিয়ক’ বুলি কৰা মন্তব্যত আশ্চৰ্য্য প্ৰকাশ কৰি মঞই কয় যে ‘মন্ত্ৰী-বিষয়াই বহুকাল ধৰি হৰিণ ভক্ষণৰ বাবে ফাৰ্ম হিচাপে চিৰিয়াখানাক ব্যৱহাৰ কৰি আহিছিল আৰু তদন্তৰ পূৰ্বে তাৰ চিন মাৰিবলৈ এতিয়া অৰণ্যলৈ হৰিণা স্থানান্তৰ কৰিব বিচাৰিছে।’
‘হৰিণা ভক্ষণৰ বিৰুদ্ধে প্ৰবল জনমত গঢ় লৈ উঠাৰ উমান পাই’ চিৰিয়াখানা কৰ্তৃপক্ষই এই সিদ্ধান্ত ল’ব খুজিছে বুলি দাবী কৰি মঞ্চই কয় যে ‘যেতিয়ালৈকে তদন্ত প্ৰক্ৰিয়া সম্পূৰ্ণ নহ’ব তেতিয়ালৈকে এটাও হৰিণা স্থানান্তৰ কৰিবলৈ দিয়া নহ’ব।’
কৃষ্ণনগৰ, গণেশগুৰি, গীতা মন্দিৰ আদি অঞ্চলত উদ্ধাৰ হোৱা হৰিণাসমূহ আমচাং অভয়াৰণ্যৰ পৰা অহা বুলি ডি এফ অ’গৰাকীয়ে কৰা মন্তব্যৰ প্ৰতিবাদ কৰি মঞ্চৰ সাধাৰণ সম্পাদক ৰাজকুমাৰ বৈশ্যই কয় ‘তেওঁৰ এই মন্তব্যই চিৰিয়াখানাৰ এলেকাত বাস কৰি থকা ৰাইজসকলৰ চকু কপালত উঠাইছে। চিৰিয়াখানাৰ সীমাৰ দেৱাল কৃষ্ণনগৰ আৰু গীতানৰৰ ফালে তিনিঠাইত ভঙা আছে। এই ভঙা দেৱালসমূহৰ কাষতে থকা স্থানীয় ৰাইজৰ দীৰ্ঘদিনীয়া অভিজ্ঞতা আছে। চিৰিয়াখানাৰ ভগা দেৱালেৰে ওলাই অহা হৰিণাসমূহ খেদি ৰাইজে চিৰিয়াখানাৰ ভিতৰলৈ সুমুৱাই পঠিয়াই।’
চিৰিয়াখানাৰ মাজত ‘বনসৃষ্টি’ নামৰ বিপণি খোলাক লৈ মঞ্চৰ প্ৰতিবাদৰ অধিকাৰ নাই বুলি ডি এফ অ’ গৰাকীয়ে কৰা মন্তব্যৰ প্ৰতিবাদ কৰি বৈশ্যই কয় ‘ডি এফ অ’ই কৰা মন্তব্যৰ অৰ্থ এইটোৱেই যে পশ্চিম গুৱাহাটী সমষ্টিৰ বিধায়ক ৰমেন কলিতাই লে’ডিজ ক্লাবৰ বিৰুদ্ধে বিধান সভাত যি বলিষ্ঠ প্ৰতিবাদ কৰি তদন্তৰ বাবে দাবী জনাইছিল, সেয়া কৰা অধিকাৰ তেওঁৰো নাই নেকি?’
চৰকাৰে চিৰিয়াখানাৰ কেলেংকাৰিৰ তদন্ত বন বিভাগৰ প্ৰধান সচিবক দিয়াৰ বিৰোধিতা কৰি বৈশ্যই কয় ‘বন বিভাগৰ মুখ্য সচিবে এই তদন্ত কৰাটো অৰ্থহীন কথা। তেওঁ নিজেও হয়তো এই কেলেংকাৰীৰ সৈতে জৰিত হৈ থাকিব পাৰে। গতিকে আমি এই কেলেংকাৰীৰ চি বি আই তদন্ত বিচাৰিছো।’
