পেট্ৰ’ল পাম্পৰ বন্ধ কোঠাত মৃতদেহ উদ্ধাৰক লৈ দবকাত চাঞ্চল্য
আজি দিনৰ ভাগত হোজাইৰ জিলাৰ ডবকা অঞ্চলৰ মদাৰতুলিস্থিত কে আৰ চৌধুৰী পেট্ৰ’ল পাম্পত এটা মৃতদেহ উদ্ধাৰ হোৱা ঘটনাই অঞ্চলটোত চাঞ্চল্যৰ সৃষ্টি কৰিছে।
উক্ত পেট্ৰল পাম্পটোৰ চৌহদত থকা এটা বন্ধ কোঠাত উদ্ধাৰ হোৱা মৃতদেহটোক নগাঁও নগৰৰ বাসিন্দা অনিল বৰুৱা বুলি চিনাক্ত কৰা হৈছে, মৃত অনিল পেচাত এগৰাকী ৰান্ধনী আছিল বুলি জানিব পৰা গৈছে।
প্ৰাপ্ত তথ্য অনুসৰি কে আৰ চৌধুৰী পেট্ৰ’ল পাম্পটো যোৱা ৬ মাহ ধৰি বন্ধ হৈ আছে। আনহাতে ইয়াত ৰান্ধনী হিচাপে কাম কৰা অনিলৰ যোৱা ২০ দিন ধৰি পৰিয়ালৰ লোকৰ সৈতে কোনোধৰণৰ যোগাযোগ নাছিল।
দবকা আৰক্ষী ঘটনাস্থলিত উপস্থিত হৈ লোকজনৰ মৃতদেহটো নিজৰ জিম্মাত লৈ নগাঁৱৰ বি পি অসামৰিক চিকিৎসালয়ত মৰণোত্তৰ পৰীক্ষাৰ বাবে প্ৰেৰণ কৰে।
অত্যধিক মদ্যপান কৰাৰ ফলতে লোকজনৰ মৃত্যু হয় বুলি স্থানীয় একাংশ লোকে সন্দেহ কৰিছে যদিও এতিয়ালৈকে ইয়াৰ আচল ৰহস্য পোহৰলৈ অহা নাই।
অৱশ্যে অনুসন্ধানৰ পিছত লোকজনৰ মৃত্যুৰ প্ৰকৃত কাৰণ জানিব পৰা যাব বুলি আৰক্ষীয়ে উল্লেখ কৰে।