নলবাৰী আখৰাস্থিত প্ৰথম অসম বিশেষ সংৰক্ষিত বাহিনীৰ অধিনায়কৰ কাৰ্যালয়ত আজি জোৱানসকলে প্ৰতিবাদ সাব্যস্ত কৰে৷ উল্লেখ্য যে, বিগত ডিচেম্বৰ মাহৰ পৰাই জোৱানসকলে দৰমহা লাভ নকৰাৰ ফলতেই আজি প্ৰতিবাদত নামিব লগীয়া হৈছে।
প্ৰতিবাদ সাব্যস্ত কৰা ASRF জোৱানসকলে অসম চৰকাৰ হায় হায়, আমাৰ দৰমহা মোকলাই দিয়ক, মন্ত্ৰী হিমন্ত বিশ্ব শৰ্মা মুৰ্দাবাদ আদি শ্ল’গানেৰে প্ৰতিবাদস্থলীৰ পৰিবেশ উত্তাল কৰি তোলে৷
আনহাতে, বিষয়া জোনালী পাটগিৰীয়ে এওলোকৰ প্ৰতিবাদক একো সহাৰি নিদিয়াৰো অভিযোগ উত্থাপন কৰে৷
মন কৰিবলগীয়া যে এই জোৱানসকলৰ পৰিয়ালে প্ৰতিটো দিনেই হাহাকৰ কৰি পাৰ কৰিব লগা হৈছে। কিয়নো ৰাজ্য চৰকাৰে এওঁলোকক মাহৰ পিছত মাহ ধৰি নিজৰ প্ৰাপ্য ধনৰ পৰা বঞ্চিত কৰি ৰাখিছে।
উল্লেখ্য যে অসম চৰকাৰে স্মাৰ্ট আৰক্ষীৰ সপোন দেখাৰ সময়তে প্ৰথম অসম বিশেষ সংৰক্ষিত বাহিনীৰ জোৱানসকলৰ এনে অৱস্থাৰ বাবে সৰ্বত্ৰে চৰ্চিত হোৱা পৰিলক্ষিত হৈছে। বাজেট নথকাৰ অজুহাতত মাহৰ পিচত মাহ ধৰি চৰকাৰে প্ৰথম অসম বিশেষ সংৰক্ষিত বাহিনীৰ জোৱানক দৰমহা আদায় নিদিয়াকৈ পৰিয়াল চলোৱাত ব্যাপক সমস্যাত পৰে৷
ৰাইজৰ জীৱন আৰু সম্পত্তিৰ নিৰাপত্তাত জড়িত জোৱানসকলৰ দৰমহা ৰাজ্য চৰকাৰে আদায় নিদিয়াত সমগ্ৰ নলবাৰীতে বিৰূপ প্ৰতিক্ৰিয়াৰ সৃষ্টি হৈছে৷ উল্লেখ্য যে বিষয়া সহ ১১৩০ গৰাকী জোৱানে তিনিমাহ ধৰি দৰমহা পোৱা নাই৷
