প্ৰাক্তন ভাৰতীয় ক্ৰিকেটাৰ সঞ্জয় বাংগাৰতকৈ এতিয়া তেওঁৰ সন্তানে লাভ কৰিছে অধিক চৰ্চা। সঞ্জয়ৰ পুত্ৰ আৰ্যান বাংগাৰে কিছুদিন পূৰ্বে নিজৰ লিঙ্গ পৰিৱৰ্তন কৰি অনয়া বাংগাৰ নাম গ্ৰহণ কৰিছিল। এতিয়া তেওঁ অনুৰাগীৰ বাবে প্ৰকাশ কৰিছে এটা সুখবৰ।
সঞ্জয় বাংগাৰ ভাৰতীয় ক্ৰিকেটপ্ৰেমীৰ বাবে এটা চিনাকি নাম। তেওঁ ভাৰতৰ হৈ ২৭খন আন্তঃৰাষ্ট্ৰীয় মেচ খেলিছে। খেলুৱৈ জীৱনৰ পিছত তেওঁ প্ৰশিক্ষক হিচাপে কেৰিয়াৰ গঢ়িছে, দীৰ্ঘদিন ভাৰতীয় দলৰ বেটিং প্ৰশিক্ষকৰ দায়িত্ব পালন কৰিছে আৰু আইপিএলতো প্ৰশিক্ষকৰ ভূমিকা পালন কৰি আহিছে। কিন্তু এতিয়া তেওঁতকৈ তেওঁৰ সন্তান অনয়া বাংগাৰে অধিক চৰ্চা লাভ কৰিছে।
বিগত কিছুদিন ধৰি সামাজিক মাধ্যমত অনয়া বাংগাৰ ব্যাপকভাৱে চৰ্চিত। তেওঁৰ লিঙ্গ পৰিৱৰ্তনৰ সিদ্ধান্তই এই চৰ্চাৰ মূল কাৰণ। আৰ্যান বাংগাৰে অস্ত্ৰোপচাৰৰ জৰিয়তে লিঙ্গ পৰিৱৰ্তন কৰি অনয়া বাংগাৰ নাম গ্ৰহণ কৰিছে। উল্লেখযোগ্য যে, অনয়াই এসময়ত যশস্বী জয়ছোৱালৰ সৈতে যুৱ পৰ্যায়ৰ ক্ৰিকেট খেলিছিল। লিঙ্গ পৰিৱৰ্তনৰ এই প্ৰক্ৰিয়াৰ সময়ত তেওঁ শাৰীৰিক আৰু মানসিকভাৱে কঠিন সময়ৰ মাজেৰে পাৰ হৈছে।
শেহতীয়াকৈ অনয়াই নিজৰ সামাজিক মাধ্যমৰ একাউণ্টত প্ৰকাশ কৰিছে যে তেওঁৰ স্বীকৃতিৰ বাবে আৰু এখোজ বাকী আছে। তেওঁ বহু কথা প্ৰকাশ কৰিব বিচাৰে বুলিও উল্লেখ কৰে। তেওঁৰ ইউটিউব চেনেলত এখন তথ্যচিত্ৰ মুক্তিৰ কথাও ঘোষণা কৰিছিল। এইবাৰ ইনষ্টাগ্ৰামত এটা নতুন পোষ্টত অনয়াই সুখবৰ শ্বেয়াৰ কৰিছে।ইনষ্টাগ্ৰামত তেওঁ লিখিছে যে অস্ত্ৰোপচাৰৰ পিছত তেওঁ সোনকালে সুস্থ হৈ উঠিছে। তেওঁ এই পোষ্টত শেহতীয়া সময়ত তেওঁক সহায় কৰা লোকসকলৰ লগতে ঘৃণা কৰাসকলকো ধন্যবাদ জনাইছে। অনয়াই পুনৰ ঘোষণা কৰিছে যে তেওঁৰ অস্ত্ৰোপচাৰৰ অভিজ্ঞতাৰ ওপৰত এখন তথ্যচিত্ৰ শীঘ্ৰেই মুক্তি পাব।
00
