অইন বছৰৰ দৰে এইবছৰো কৃষি চপোৱাৰ পিছত উদযাপন কৰা হাছা কেকান উৎসৱটিৰ ছাত্ৰ সিঙ টেৰণ মেম’ৰিয়েল ক্লাৱৰ উদ্যোগত ডিফুৰ লৰুলাংছোস্থিত হাছা কেকান ক্লামত জাক জমকতাৰে শুভাৰম্ভণি হয়। জানুৱাৰিৰ ১৪ তাৰিখৰ পৰা অনুষ্ঠিত হোৱা উৎসৱটিৰ লগত সংগতি ৰাখি আজি দ্বিতীয়দিনাৰ কাৰ্যসূচী হিচাপে পুৰুষ আৰু মহিলা দুয়োটা শাখাতে দৌৰ প্ৰতিযোগিতা আয়োজন কৰে।
উল্লেখযোগ্য যে দেওবাৰে সন্ধিয়া হাছা কেকান উৎসৱৰ শুভাৰম্ভণি হয় পৰম্পৰাগত ৰীতি-নীতি তথা লোক নৃত্য তথা গীত-মাতেৰে। কাৰ্বীসকলে অতীজৰে পৰা পালন কৰি অহা এই হাছা কেকান উৎসৱৰ আয়োজন কৰে বছৰটোৰ উৎপাদিত প্ৰচুৰ পৰিমানৰ শস্য চপোৱাৰ পিছত। স্মৰ্তব্য যে লোক বিশ্বাস অনুসৰি এই উৎসৱৰ জৰিয়তে ভগৱানৰ ওচৰত কাৰ্বীসকলে প্ৰাৰ্থনা জনায় যাতে অহা বছৰো শস্য উৎপাদন বৃদ্ধি পায়।
উৎসৱৰ অংশস্বৰূপে আয়োজন কৰা দৌৰ প্ৰতিযোগিতাখনত পুৰুষৰ শাখাত জয়সিঙ ৰংহাঙে প্ৰথম স্থান দখল কৰাৰ লগতে হাৰসোৰান গিৰিছাই দ্বিতীয় আৰু বিজয় নাৰ্জাৰীয়ে তৃতীয় স্থান দখল কৰিবলৈ সক্ষম হৈছে। আনহাতে মহিলাৰ শাখাত ৰাজুনী সিঙনাৰ্পী, চেৰদিহুন টিছ’পি আৰু চামিলী এংটিপিয়ে ক্ৰমে প্ৰথম, দ্বিতীয় আৰু তৃতীয় স্থান দখল কৰিছে।
এই সমাৰোহখনত কাৰ্বী যাজক তথা কাৰ্বী লোকগীতৰ সূচক ৰামচিয়াং ইংতিয়ে অনুষ্ঠান পৰিৱেশন কৰে। ছাত্ৰ সিঙ টেৰণ মেম’ৰিয়েল ক্লাৱৰ সভাপতি মানসিঙ টাৰো, সম্পাদক ষ্ট্যেলিন টাৰোৰ লগতে ক্লাৱৰ সদস্যৰ উপৰি বিভিন্ন লোকে ঐতিহাসিক উৎসৱৰ শুভাৰম্ভণি অনুষ্ঠানত উপস্থিত থাকে।
