নামনি অসমৰ বিভিন্ন প্ৰান্তত বন বিভাগ আৰু জিলা প্ৰশাসনৰ উচ্ছেদ অভিযান অব্যাহত থকাৰ মাজতে গোৱালপাৰা জিলাৰ কৃষ্ণাইৰ পাইকান সংৰক্ষিত বনাঞ্চলত নতুন উচ্ছেদ অভিযানৰ প্ৰস্তুতি চলিছে বুলি জানিব পৰা গৈছে। বিদ্যাপাৰা আৰু বেতবাৰী অঞ্চলত অবৈধভাৱে বসবাস কৰা লোকসকলৰ বিৰুদ্ধে এই অভিযান চলোৱা হ’ব বুলি সদৰী কৰিছে। জিলা প্ৰশাসন আৰু বন বিভাগে ইতিমধ্যে এই অঞ্চলত টহল আৰম্ভ কৰিছে আৰু ১০ জুলাইৰ পূৰ্বে বনাঞ্চলৰ ভূমি খালি কৰিবলৈ ঘোষণা কৰিছে।
উল্লেখ্য যে কিছুদিন পূৰ্বে গোৱালপাৰাৰ হাচিলা বিলত চলা উচ্ছেদ অভিযানৰ সময়ত উত্তেজনাময় পৰিস্থিতিৰ সৃষ্টি হৈছিল। মুখ্যমন্ত্ৰী হিমন্ত বিশ্ব শৰ্মাই সেই সময়ত হাচিলা বিল পৰিদৰ্শন কৰি অবৈধ দখলদাৰীৰ বিৰুদ্ধে কঠোৰ পদক্ষেপৰ গ্ৰহণৰ কথা ঘোষণা কৰিছিল। সেই ঘোষণাৰ পিছতে এইবাৰ পাইকান সংৰক্ষিত বনাঞ্চলত উচ্ছেদৰ প্ৰস্তুতি চলাইছে।
জানিব পৰা মতে, পাইকান সংৰক্ষিত বনাঞ্চলৰ মুঠ ৭১১ হেক্টৰ ভূমিৰ ভিতৰত ১৩৮ হেক্টৰত অবৈধভাৱে বসবাস চলি আছে। এই বেদখলীকৃত ভূমি পুনৰুদ্ধাৰৰ বাবে ১১ জুলাইৰ পৰা উচ্ছেদ অভিযান আৰম্ভ হ’ব। গোৱালপাৰাৰ জিলা বন বিষয়া তেজছ মৰিস্বামীয়ে সংবাদ মাধ্যমক জনোৱা মতে, বন বিভাগ আৰু জিলা প্ৰশাসন ইতিমধ্যে এই অভিযানৰ বাবে সাজু হৈছে। বিদ্যাপাৰা আৰু বেতবাৰীত বৃহৎ সংখ্যক বন বিভাগৰ বেটেলিয়ন, বিষয়া, কৰ্মচাৰী আৰু আৰক্ষীৰ দল টহল দিছে।
তেওঁ আৰু কয় যে অবৈধ বাসিন্দাসকলক ১০ জুলাইৰ পূৰ্বে ভূমি খালি কৰিবলৈ জাননী জাৰি কৰা হৈছে। মাইকযোগে এই ঘোষণা কৰাৰ লগতে জুটীয়াভাৱে নিৰীক্ষণ চলি আছে। ইতিমধ্যে বিদ্যাপাৰা আৰু বেতবাৰীৰ কিছু বাসিন্দাই নিজৰ ঘৰ-বাৰী ভাঙি অন্য ঠাইলৈ স্থানান্তৰিত হৈছে।
উল্লেখ্য যে পঞ্চৰত্ন আৰু অজগৰ অৰণ্যৰ দৰে গোৱালপাৰাৰ বনাঞ্চলতো বনৰীয়া হাতী, নাহৰফুটুকী বাঘ, লাজুকী বান্দৰ, খুটীয়া পহু আদি বহুতো বন্যপ্ৰাণীৰ আৱাসস্থল। পঞ্চৰত্ন অৰণ্য বিশেষকৈ হাতীৰ সন্তান প্ৰসৱৰ বাবে গুৰুত্বপূৰ্ণ।
