পৰশুৰাম কুণ্ডৰ সৰ্বাত্মক বিকাশৰ বাবে অৰুণাচল প্ৰদেশৰ ৰাজ্যপালৰ পৰামৰ্শ
অৰুণাচল প্ৰদেশৰ ৰাজ্যপাল ব্ৰিগেডিয়াৰ বি ডি মিশ্ৰই শুকুৰবাৰে লোহিত জিলাত অৱস্থিত পৰশুৰাম কুণ্ড ভ্ৰমণ কৰে।
তীৰ্থস্থানখনৰ বিষয়ে জানিবলৈ ৰাজ্যপালগৰাকীয়ে লোহিত জিলাৰ উপায়ুক্ত কাৰ্মা লেকি আৰু আন জিলা বিষয়াসকলক লগত লৈ ৪০০ টা চিৰিৰে নামি কুণ্ডটোৰ তলিত থকা পৱিত্ৰ স্থানত উপস্থিত হৈ কুণ্ডটো পৰিদৰ্শন কৰে।
তেওঁ পৰ্যটকৰ বাবে নিৰ্মাণ কৰা আন্ত:গাঁথনি তথা অন্যান্য সা-সুবিধাসমূহৰ বুজ লয়।
জিলা বিষয়াসকললেৰে সৈতে মত বিনিময় কৰি ৰাজ্যপাল গৰাকীয়ে অঞ্চলটোৰ সৰ্বাত্মক বিকাশৰ বাবে পৰামৰ্শ আগবঢ়ায়। স্থানীয় ৰাইজৰ অৰ্থনৈতিক বিকাশৰ লগতে তীৰ্থযাত্ৰীৰ বাবে সা-সুবিধাকে ধৰি ৰাজ্যখনৰ বিখ্যাত তীৰ্থস্থানখনৰ সামগ্ৰিক বিকাশৰ ওপৰত গুৰুত্ব আৰোপ কৰে। তেওঁ লগতে সকলো বিষয় সামৰি এটা ব্লুপ্ৰিন্ট তৈয়াৰ কৰিবলৈ আহ্বান জনায়।
ইয়াৰ আগেয়ে ৰাজ্যপালে ওৱাক্ৰো আৰু পৰশুৰাম কুণ্ড অঞ্চলৰ নেতৃস্থানীয় ব্যক্তি, গাওবুঢ়া, পঞ্চায়ত প্ৰতিনিধিকে ধৰি স্থানীয় ৰাইজক সাক্ষাৎ কৰি কানিৰ খেতি, মাদক দ্ৰব্যৰ প্ৰচলন আৰু বন্দুক সংস্কৃতিৰ বিষয়ত তেওঁৰ চিন্তা ব্যক্ত কৰে।
তেওঁ কয় যে শিশুসকলৰ মাজত মাদক দ্ৰৱ্য সেৱনৰ প্ৰতি অভিভাৱক, আত্মীয়. চুবুৰীয়াকে ধৰি গোটেই সমাজখনে নজৰ ৰাখিব লাগে। ৰাজ্যপালে খেতিয়কসকলৰ বাবে জীৱিকাৰ বিকল্প উৎসৰ ওপৰত গুৰুত্ব দিয়ে।
ৰাজ্যপালগৰাকীয়ে বন্দুক সংস্কৃতিৰ বিষয়ে উল্লেখ কৰি ৰাইজক ইয়াক প্ৰতিৰোধ কৰাৰ ওপৰত গুৰুত্ব আৰোপ কৰে। তেওঁ কয় যে শান্তি আৰু উন্নয়নৰ বাবে আমাৰ জনসাধাৰণে হিংসা, লুণ্ঠন আৰু সন্ত্ৰাসবাদৰ বিৰুদ্ধে মাৰবান্ধি থিয় হ’ব লাগিব।
নামছাইলৈ বুলি যোৱাৰ আগেয়ে ৰাজ্যপাল আৰু তেওঁৰ পত্নীয়ে কুণ্ডৰ ওচৰত থকা পৰশুৰাম মন্দিৰত পূজা সেৱা আগবঢ়ায়।